Abaphila ngokuthengisa ezitaladini zedolobheni lakoBulawayo amaVendors bathi uhlelo lwekhansili olokubabhalisa ukuthi basebenze ngokusemthethweni olweVetting luqhubeka kakuhle njalo abasathathelwa impahla abazithengisayo ngamapholisa kamanisipala walelidolobho njengalokho abathi bekusenzakala kunsukwana ezedluleyo.
UMnumzana Dumisani Ncube, unobhala jikelele wenhlanganiso yabasomabhizimusi abasacathulayo eyeBulawayo Upcoming Traders Association, yena ugcizelela ukuthi ukukhahlamezwa kwabantu kusamile okwamanje besadingelwa indawo yokuyasebenzela lalobanje indawo zankona zingasoze zenele umuntu wonke.
Uqhubeke ethi lolu hlelo luqutshwanje ngoba sokutholakele ukuthi kulabanye abantu abaphila ngokuthengisa asebevele kwamanye amadolobho abalakho ukuthathela izakhamizi zakoBulawayo amathuba okuthi basebenzele edolobheni labo.
