Inani labantu asebefunyenwe belegcikwane leCoronavirus lokhe liqansa eZimbabwe.Okwamanje sekulabayisikhombisa asebefunyenwe beleCOVID-19.
Abanye abantu sebeziyenga ngokunatha imithi ehlukileyo emizameni yokuzivikela.
Ingcitshi kwezempilakahle ziyayiphika imibiko yokuthi usukhona umuthi wokwelapha lumkhuhlane loba ukwehlisa ulaka nxa umuntu esethe esegula.
UDokotela Rudo Gumbo uchasisa kabanzi ngale imibiko ayithi ngeyamanga esisabalaliswa ngabantu.
''Umkhuhlane weCorona virus usukhona ezweni njalo usuthethe umphefumuo owodwa eHarare ngakho lingayengani linatha imithi ehlukeneyo lithi lizivikela ukuwubamba okwamanje akukabi lomuthi wokwelapha igcikwane leCOVID-19. Abanye sebethi bengezwa ingathi bayakhwehlela babalekele emakhaya bethi bayabethwa ngumoya, akusebenzi lokhu njalo kulabanye asebesebenzisa amagloves ngendlela engayisiyo bethi bazivikela ekubambeni lumkhuhlane. Sicela lilalele abezempilakahle kuphela ngalo umkhuhlane.''
UMqondisi wezempilakahle esibhedlela seMpilo Central, uDokotela Solwayo Ngwenya, uthi abantu abalandele imilayo yabezempilakahle hatshi eyabantu makhaza.
''Umkhuhlane weCovid-19 usubambile umhlaba wonke jikelele usubulele inkulungwane lenkulungwane. Utholakala umuntu engathimula kumbe engakhwehlela. Likhuthazwa uhlala emakhaya. Kuvimbwa ukuba ungamemetheki, ligeze njalo izandla zihlale zihlanzekile, ligcikwane elitsha liyabulala abantu abadala labathatha imithi abalamasotsha aphansi. Uma ucabanga ukuthi usulawo tshayela abezempilakahle bazolithwala ngezimota zezigulane bazolihlola ukuze lingahambi lilakho ukuthelela abanye.''
Isakhamuzi sakoBulawayo, uMnu Sibangilizwe Dumezweni, uthi ngombono wakhe iCOVID-19 ngumvimbano owelapheka ngesithelo selemon ngokukhamela lumhluzi emakhaleni kanye lokufutha.
''Ngokubona kwami lo ngumkhuhlane wophepha ulakho ukuthi uthontisele umhluzi wamalemoni emakhaleni kuyakhupha udendaoluyilo olubulala abantu. Umuntu ulakho njalo ukuthi afuthe ngamanzi lakho kuyawubulala lumkhuhlane.''
Odokotela lengcwethi zempilakahle eZimbabwe lasemazweni atshiyeneyo kanye labenhlanganiso yezempilakahle emhlabeni jikelele eye World Health Organisation bathi akukabi lomuthi wokwelapha umuntu obanjwe ngumkhuhlane lo omemetheka okumangalisayo
