Abantwana abafunda eSebhumane Primary eNkayi babikwa bebanjwa ngamandla ukuphinda umnyaka wezifundo nxa abazali bengabhadalanga indleko zesikolo.
Isinqumo lesi sibikwa sabekwa ngamalunga eSchool Development Committee (i-SDC esikolweni esibikwa silabantwana abangangaphezu kwamakhulu ayisithupha).
USobhuku wesiqintini seMazambane, uMnu. Mazambane uthi abantwana phose abalikhulu babhekane lohlupho lolu.
Omunye umzali olomntwana esikolo unkosikazi Deliwe Masuku eseSebhumane uthe isikolo sifuna imali njalo usethengise inkukhu kanye lembuzi ukuze ayebhadala.
uNkosikazi Senzeni Moyo uthe sebeke babuza ababalisi esikolo ukuthi kwenzakalani babatshela ukuthi abafundisi abantwana abaphindisiwayo.
Unkosikazi Sithabile Dube ngomunye othi abantwana bafunda nzima njalo yena njengomzali kuthiwe ayethwala inhlabathi njengembadalo yendleko zesikolo.
Isiphathamandla senhlananiso eye Zimbabwe National Educators Union umnumzana Thembelani Dube uthe kuyadabukisa kakhulu ukuthi umphathisikolo nguye owenza ukuthi abafundi baxotshwe ngenxa yokungabhadalwa kwendleko zesikolo ethi lokhu akusomlandu wabantwana njalo lokhu kubekwe obala esisekelweleni sombuso.
Ethi njalo ukungaphumeleli kwabafundi ezikolo zaseMatabeleland North kutshengisa ukuthi kulenhlupho ezinengi mayelana lezemfundo.
Kuviki edluleyo kuvele ukuba izikolo ezingamatshumi amabili lasitshiyagalolunye azila ngitsho lomntwana oyedwa ophumeleleyo ezifundweni zikagrade 7 ngomnyaka ka2017.
Lokhu kwenzakala kuvele kugcwele ukukhonona phakathi kwabantu beMaNdebeleni ngenxa yokuthi abafundi abaphumeleli ezifundweni zabo ngezizatho ezehlukeneyo ezigoqela ukulethwa kwababalisi abavela kwezinye izigaba bangakhulumi ulimi lwabantwana ababafundisayo.
