Inhlangano yokuthapha imbono kazulu ngokuguqulwa komthetho ophathelane lokusakaza equkuthwe yiBroadcasting Services Amendment Bill isungulwe eHarare ngoMvulo abanengi besithi idale lePhalamende kumele lesule umugqa ofaka umlandu wokukhetha amalunga ogatsha lweBroadcasting Authority of Zimbabwe (BAZ) ezandleni zikamongameli welizwe ngoba lokhu kusenza ukuthi abasekela uhulumende kumbe ibandla elibusayo kube yibo kuphela abaphiwa amalayisensi okusakaza.
Ngaphandle kokuthi ngubani omele akhethe amalunga eBroadcasting Authority of Zimbabwe, olunye udaba oluhluphe kakhulu emhlanganweni wanamuhla ngolokuthi ungaguqulwa, umthetho weBroadcasting Services Act uzabamba ngamandla abantu abalezimota ukuthi bathenge umthelo weZBC kuqala ukuze benelise ukuthola amaphela avumela izimota ukuhamba emgwaqweni avela kugatsha lweZimbabwe National Road Administration lokuthenga imithelo yokuvikela imota, ama-insurance.
Abantu abangene umhlangano obukhokhelwa yikomidi yedale lePhalamende ephansi kogatsha lwezokusakaza eyePortfolio Committee on Information, Publicity and Broadcasting Services bathe bafuna amalunga eBroadcasting Authority of Zimbabwe akhethwe yiPhalamende ngokwayo, hatshi nguMongameli esebenzisana lomphathintambo wezokusakaza, njengokutsho komthetho.
Omunye wabakhulume emhlanganweni lo emele inhlanganiso yeMedia Alliance of Zimbabwe nguMnu Perfect Hlongwane.
“Kumele umthetho lowu wenze ukuba Amandla okukhetha ama board members awe BAZ aphiwe iphalamende hatshi uMinister ngoba lokhu kwenza ukuba kube lokusekela kwabantu abathize ukweza ukuba imsakazo yethu ingabu ngelembono ehlukeneyo.”
Amazwi kaHlongwane asekelwe nguMnu Cephas Mabvuta, yena obemele inhlanganiso yemisakazo yezabelo, iZimbabwe Association of Community Radio Stations (ZACRAS).
“Imisakazo eminengi ecina ithola amalicense yandise ukuba ngesekela uhulumende ngoba loabo abanikeza amalicense yibo abayabe besitsho lokhu. Ngabe kuthiwa lokhu kwenziwa lidale lona elilabameli bamacele onke ngabe kakufani kumele kulungiswe lokhu.”
Abanengi bethesa ugatsha lweBroadcasting Authority of Zimbabwe umlandu wokunikeza amankampani alobudlelwano lohulumende kumbe lebandla elibusayo kuphela amalayisensi okusakaza afana leZBC, ZTN, NRTV, FairTalk Communication, leAB Communication.
Udaba lokuthi abalezimota kumele bathenge ilayisensi yeZBC kuqala ukuze benelise ukuthola amanye amaphepha okuhamba kwezimota zabo emgqaqweni yinto ecubula abanengi elizweni.
Omunye wabo ngumkhokheli wenhlanganiso yeZimbabwe Editors Forum, uMnu Njabulo Ncube.
“Akwenzi ukuba imali le ibhadalwe ngabantu abatshayela izimota ngenkani. Sithi thina uhulumende kumele aqale alungise ukuba ZBC isebenzele okufunwa ngumuntu wonke lokuba imali evela kuhulumende iphiwe umuntu wonke.
UNcube usekelwe nguMnu Mattheas Dube, isikhamuzi seHarare, yena otshele ikomidi yedale lePhalamende ukuthi kumele iZBC ikhiqize inhlelo ezithakazelelwa ngabantu ukuze ibahuge bathenge amalayisensi alumsakazo ngokuthanda kwabo hatshi ngokuphoqwa ngumthetho.”
“Kumele ZBC isinikeze inhlelo ezikhwabithisayo ukuba sibhadale imali abayifunayo hatshi ukuthatha imali zethu nje.”
Kodwa omunye obesemhlanganweni ofanayo osekela ibandla leZanu PF uMnu Nisbert Tshuma uthi uyavumelana kakhulu lengququko efunwa ngumthetho lo.
“Thina sivumelana lawo umthetho lowu ngoba wenza ukuba sithande ilizwe lethu lomsakazo we ZBC hatshi ukuba silalele imsikazo eminye engakhulumi iqiniso ngeZImbabwe.”
Kuminyaka esanda kwedlula abantu abafana lowayengummeli weHarare East uNkosikazi Jessie Majome bahambisa umsakazo weZBC emthethwandaba besithi abafuna kubhadala umthelo ngoba inhlelo zawo zisekela ibandla elibusayo.
Okunye okuhluphayo kulumthetho yikuba labo abafuna ukudinga indlela zokusakaza bevunyelwe ukufaka izicelo yiloba nini. Okwamanje amankampani amelela iBroadcasting Authority of Zimbabwe ukuthi itsho ukuba amagagasi akhona loba hatshi.
Ikomidi yePhalamende ekhokhela imihlangano le izakuya njalo ezigabeni ezibalisa eMutare, eMarondera, eMasvingo laseLupane ukuyathapha imbono kazulu ngokuthi uyavumelana lenguquko equkethwe yiBroadcasting Services Amendment Bill le kumbe hatshi.
Forum