Owake waba ngunobhala jikelele wenhlanganiso yomanyano wamazwe omhlaba eye United Nations uMnumzana Kofi Annan kasekho. UMnumzana Annan utshone ngoMgqibelo ekuseni eseleminyaka engamatshumi ayisitshiyangalombili-80. Ubesengumgcinisihlalo wenhlanganiso ye Council of Elders yona ayikhokhele kweleZimbabwe kumaviki ambalwa edluleyo bezohlolisisa ukuthi ukhetho luqhutshwa ngendlela eqondileyo na.
Uzulu weZimbabwe uveze ukudana ngokutshona kukaMnu. Annan kodwa abanye bathi isinqumo asenziwa ngumanyano we Council of Elders esokuthi ukhetho lwaqhutshwa ngemfanelo sasingalunganga ngoba impilo zabantu zalahleka kulandela lolukhetho.
Omunye wabatshonjalo nguMnumzana Butler Tambo ohlaziya ezombusazwe. Uthe uyamsola njalo umufi ngokukhipha amasotsha eRwanda okwabangela impi lokubulawa kwabantu abangaphezu kwenkulungwane ezingamakhulu ayisitshiyagalo lunye.
Olwela amalungelo oluntu uMnumzana Nkosikhona Moyo uthi ulusizi ngokutshona kukaMnu. Annan ngoba ubezimisele ukulwela amalungelo oluntu. Wengeze wathi inkulumo yokuthi ukhetho lweZimbabwe lwaluqhtshwa kuhle kwakungaqondanga ngoba kungela bufakazi balokho.
UNkosikazi Cynthia Dube uthi uMnu. Annan umkhumbula ngokulwela amalungelo oluntu kodwa wadana embona ekhuluma ngokhetho lweZimbabwe.
UMnumzana Douglas Nyathi uthi umufi uMnu. Annan wayekhuthalele ukulwela ukuthi kube lobukhokheli obuqotho njalo kube labakhokheli abasakhulayo.
Umufi uMnu. Kofi Annan yisizalwane sase Ghana kodwa waduma kakhulu ngokubangunobhala weUN njalo waqala inhlanganiso yakhe eyeKofi Annan Foundation. Wayephatheke kakhulu ekulwiseni ukuthi umhlaba ube lokuthula, kuvikelwe amalungelo oluntu, njalo kuhlonitshwe lemithetho.
