Inengi labantu abasemhlubulweni weMandebeleni bayakusola kakhulu ukubotshwa, ukutshaywa kanye lokuhlukuluzwa ngabezomvikela ngesikhathi wonke umuntu kumele ahlale emakhaya phansi kweziqondiso zikahulumende zokuzama ukuvimba ukumemetheka lokuthelelanwa kwegcikwane leCOVID-19 lona eselithethe imiphefumulo yabantu abanengi emhlabeni jikelele.
UNkosikazi Nomusa Sithole uthi ubotshiwe wayavalelwa eCentral Police Station.
''EZimbabwe lapha asazi ukuthi ilockdown bayenzanjani, uMongameli wathi kukhona okungeke kuvume ilockdowm, izolo ngibotshiwe ngisiyathengela uMama amaphilisi uphathekie. Bengizihambela ngedwa bayasiminyanisa eCetral Police Station ilanga lonke, ngibatshengisile amaphepha lamaphilisi ngivela thenga kodwa abalalelanga asazi ukuthi sekumele siphile njani.''
Olwela amalungelo oluntu, uMnu Mbuso Fuzwayo, umabhalane jikele weIbhetshu likaZulu usola isiphatho sabezomvikela.
''Akusizi lutho ukutshaya abantu abahamba bedinga ukudla, abantu baphiwe isiqondiso sokuthi behlale emakhaya kodwa uhulumende kabaphanga ithuba okulungiselela ukuthi baphile, uhulumende kalancedo asethe walunikeza abantu kulusizi ukuthi amasotsha lamapholisa ahamba etshaya abantu kungakhathalekile lobunzima abaphekane lalo ngoba inengi liyazisebenza,''
Ilunga ledale lephalamende koBulawyo ePumula, uNkosazana Sichelesile Mahlangu laye uvumelane loFuzwayo ethi uhulumende usesephula amalunglo oluntu engananzelele.
''Asisakwazi ukuthi abomthetho sebebopha abantu mahlayana bebathwala ngemota beminyene njalo bayebavalela esitokisin kungela kuhlolwa, bathathela abantu impahla abazithengisayo sicela amapholosa alandele umthetho abanye benza kuhle kodwa abanye babopha abantu bebatshaye.''
Isakhamuzi sakoBulawayo uMnu Zibusiso Mkhwananzi uthi kuqakathekile ukuba abantu balandele iziqondiso zikahulumende bengephuli umthetho.
''Ukubotshwa kwabantu ngamapholisa lamasostha akulani lendaba zepolitiki kodwa kungengxa yesimemezelo sokumisa ukumemetheka komkhuhlane weCOVID-19 ukuba abantu kumele bahlale emakhaya, abephula leso siqondiso behamba mahlayana yibo ababhekane lodubo lokuhlukuluzwa ngamapholisa.''
IStudio izamile ukukhulumisana labezomvikela, ukuze sizwe icele labo ngaloludaba lokuhlukunyezwa kwabantu bebotshwa mahlayana kodwa bebengadobhi ucingo lwabo.
IZimbabwe ingene kuviki yesibili yohlelo lweziqondiso zikahulumende zokuthi abantu bahlale emakhaya benganyakazeli ndawana yonke, ukuze kuvinjwe ukumemetheka lokuthelelanwa komkhuhlane weCOVID-19 osubulele abantu abambalwa emhlabeni jikelele.
EZimbabwe, lumkhuhlane usuthethe umpefumulo womuntu oyedwa kuthi abayisifica munwe munye kusiyatshona izolo bekubikwa sebelegcikwane, lobanje eMaNdebeleni kungela sibhedlea esilakho ukonga kumbe ukuhlola igcikwane leCOVID-19.
Okwamanje, inhlanganiso yezempilakahle emhlabeni jikelele eyeWorld Health Organisation ithi akukabi lomuthi wokwelapha iCOVID-19, yikhoke abantu kumele baqakathekise ukulondoloza ukuhlanzeka lokuzivikela.