Inkampani yamandla kagetsi eyeZESA ithi isilendlela ezintsha zokulawula ukusetshenziswa kukagetsi ngonanzelelo ukuze layo ihlale isenelisa ukuthenga amandla kagetsi kwamanye amazwe. Kodwa lokhu akuphathi kuhle abanengi ababona kuyikukhuphulelwa inhlawulo kagetsi mahlayana.
Umnunzana David Tshuma uthi amagetsi ahlezi ecitshiwe kuthi lapho esiba khona intengo yawo iyabe ingafinyeleleki.
“Amagetsi khathesi awasathengeki sikhuluma so i79 units esasiyithenga nge $8 sesiwathenga nge$50 wonalawo amaunits awayiqedi iviki ,engaqedi iviki kunjalo awabonakali ,engabonakali kunjalo imali azikho so angazi ukuthi abantu beZesa bathi senzenjani ngento yonaleyi ngoba langapha amagas ayadula lenkuni azithengeki vele sokunzima.”
Umnunzana Mthulisi Ncube ongumhlali wakoBulawayo uthi ingcazelo yeZESA kayizwisiseki.
“Abantu bayadubeka ezindlini ngenxa yamaprices amagetsi ,amagetsi kuthiwa ungaphangisa ukuwathenga mhlaka 1 but uyathola kuyi 79units lapho into esiyabe sizitshelwa ziyabe zingahambelani.Ifonini ukuthi uthenge amagetsi nge ecocash awasathengeki kuqala ku$50 khonapho efonini le$50 uyabe ungelayo lesikhathi sokuthi uyethenga amagetsi uyabe ungelaso kwesinye isikhathi ekuphelele ebusuku ngoba amagesti awasela sikhathi ukuthi ahamba sikhathi bani abuye sikhathi bani so lathi sesicela ukuthi intengo ngani iyehla kancane ukuthi lathi sikwanise ukuthenga amagetsi.”
Unkosikazi Pamela Ngulube esinye njalo isakhamuzi sakoBulawayo sigcizelela kulokhu.
“Indaba yamagetsi ayisazwisiseki ukuthi bakwenza njani khathesi iprice yakhona isiqanse kakhulu ukuthi nxa kumele uthenge amagetsi akulaster inyanga yonke kufanele uthenge ngehalf yesalary yonke ubususithi uzathenga ngani okunye lokhu .Iprice yakhona khathesi isikhwele kakhulu njalo lamanye ama altanative source awegas ukhangele lenkuni akuthengeki so asisakwazi ukuthi thina sense njani loba ungathi udinga amasolar lights ama prices ayabe efakwe ngeUS imali esingayiholiyo .’’
Esinye njalo isakhamuzi sakoBulawayo umnunzana Blessing Sithole uthi kumnyama kuye ngalindlela esisetshenziswa yiZesa.
“Amagetsi siyawabona ukuthi aseqanse kakhulu awasathengeki besesithwele nzima ukuthi sithenge njani njengoba bayasitshela ukuthi ungathenga mhlaka 1 uyathenga amagetsi amanengi nxa usubuyela ayabe semalutshwane .Akusasebenzeki vele yisystem bani leyi abayifakileyo ngenxa yokuthi ungathenga awe$200 inyanga yonke nxa uthi uyabuyela bethi sebehlisa ama units vele akuqondakali okuyinto kwakhona”
Indlela yabeZesa entsha yehlukaniswe yaba yizigaba ezintathu zokuthola ugetsi. Isigaba sinye ngasinye silentengo yaso ehambelana lendlela imuli esebenzisa ngayo ugetsi. Intengo yamandla kagesti ikhwezwe ngesilinganiso sokungamakhulu edlula amathathu ekhulwini-320.
