Abantu abanengi abangene umhlangano obuqoqwe libhanga leReserve Bank of Zimbabwe namuhla eHarare bathi lokhu bengayithembi imali entsha eyohlobo lweZimbabwe Gold (ZiG) engatholakaliyo njalo okwakumele incedisa ekulungiseni udaba lwetshintshi.
Bathi imali le kayilancedo ngakho-ke kunzima ukuba belandele iziqondiso zonke abazinikwa libhala leRBZ ezokusetshenziswa kwemali le.
Izakhamizi zeHarare zitshele uMnu. Innocent Matshe, obemele usibalukhulu webhanga leRBZ, emhlanganweni oqoqwe libhanga leli obumayelane lokusetshenziswa kweZiG, ukuthi imali le ngeyokukhohlisa abantu beZimbabwe. Omynye wabethule umbono lo nguMnu. Xavier Phiri.
“Sesake sakubona lokhu okwenzakalayo. Thina imali leyi vele asiyethembi ngoba ibuya kusetshenziswa uswazi amapholisa esithi ithandeni. Kambe lakuzwa ngaphi khonokho. Imali kumele izithengise yodwa.”
Lokhu kusekelwa yisikhamuzi seHarare uMnu. Mlungisi Tshuma.
“Vele nxa uhulumende ngokwakhe esebenzisa imali yase Melika athi thina sisebenzisa ama ZiG kuba nzima ukuba sithi kambe yimali ezasisiza kumbe sifuna ukulahlekelwa ngamadola ethu.”
UMnu. Matthew Sibindi laye ohlala eHarare obesemhlanganweni lo uthi iZiG ihlupha ngokuthi abantu bacina besebenzisa imali enengi uma begada imitshova kumbe bethenga impahla ngenxa yokuswelakala kwetshintshi.
“IZiG singalamukela kodwa okwakhathesi eqinisweni yikuba imali yakhona kayikho emkambeni. Sikhuluma nje nxa ufuna ukuthenga okwe 50 cents ule dollar ucina usebenzisa idollar elilodwa ngoba kungelantshitshi. Lokhu kumele kulungiswe.”
UMatshe uthe kumele abantu bonke besebenzise imali le.
“IZiG yimali yethu. Ama-US dollar lawa afunwa ngabantu kawasiwo wethu, ama-rand, lama pula kayisiyo mali yethu. Ukuswelakala kwayo hayi sizakulungisisa.”
Ingcwethi kwezombusazwe lezomnotho, uMnu. Rejoice Ngwenya, okunhlanganiso yeCommon Market for Liberal Solutions, uthi kumele uhulumende avume ukuba iZiG kayisebenzi kahle.
“Uhulumende kumele akubone ukuba imali le kayamukeleki alethe imali yohlobo lwama US dollars ngoba vele kusobala ukuba uzulu labezitolo kabakayamukeli.”
Sekubotshwe abantu abedlula ikhulu okuthiwa bathenga bethengisa imali okungekho emthethweni okudala ukugugudeka kweZiG. Ingcwethi kwezomnotho zithi iZiG ifana xathu lemali yohlobo lwama bond leyinye eyeka yasetshenziswa elizweni yalahlwa ngenxa yokugugudeka okwesabakayo.
Forum