Bekulabantu abaphansi kwenkulungwane enkundleni yeGwanzura eHarare namuhla ngesikhathi kunanzwa usuku lwezisebenzi olwe-Workers Day.
Uhulumende wethule umbiko othi uyazazi inhlupho zabo lobanje inengi lisithi usuku lolu luza ngesikhathi bebhekane lobunzima obukhulu.
Izisebenzi ebezinanza usuku lweWorkers Day eHarare zithe zithwele nzima ngoba kazitholi imali eyeneleyo eyokuphilisa imuli zabo.
Inengi lazo zithola imali ephansi kakhulu kuthi kwesinye isikhathi kaziyitholi abaqhatshi bekhala ngokungenzi impahla ngemfanelo ngenxa yokugugudeka komnotho.
Kunanzwa usuku lwezisebenzi, uhulumende weZimbabwe uthe wenza konke okusemandleni akhe ukubona ukuba izisebenzi zithola iholo eleneleyo, indawo ezinhle zokusebenzela ndawonye lamathuba angcono.
Emazwini akhe alonyaka, umphathintambo kahulumende obona ngezisebenzi, uMnu. July Moyo, ethulwe ngumholi kahulumende obona ngezisebenzi, uMnu. Busani Moyo, wazise ukuba uhulumende uyazazi indubo zezisebenzi zakhe.
''Siyazazi indubo ezibhekane lezisebenzi njalo silwisana lazo. Uhulumende uyazithanda izisebenzi zakhe. Sifuna ukuba sibambane sonke sakheni ilizwe.”
Uqhubeke esithi ukwethulwa kwemali yeZimbabwe Gold kumbe -ZiG ngenye yezindlela zokuba kuvuselelwe umnotho welizwe wona osumi manzonzo.
Ekhuluma emele izisebenzi unobhala jikelele wenhlanganiso eye Zimbabwe Congress of Trade Union, uMnu. Japhet Moyo, uthe izisebenzi zeZimbabwe azithokozi ngesimo esiselizweni.
“Izisebenzi zilenkinga kundaba lwentengo yempahla ngapha iholo lingamuva okumangalisayo. Sileholo eliphansi kakhulu, njalo abantu abantu abanengi bayazisebenza.’’
Isikhulumeli senhlanganiso yabababalisi eyeAmalgamated Rural Teachers Union, uMnu. Thembakuye Moyo, laye uthe intengo yempahla leholo akuhambelani.
“Esikubonayo yikuba iholo lethu vele kaleneli. Okukhona yikuba imali leyi kayikwani lutho, uyathi uvela ebhanga uswele lokuba ubambe ngaphi’’
Omunye okade esembuthanweni wokunanza iWorkers Day ngumbalisi, uNkosikazi uCathrine Dube, uthe imali ayitholakali elizweni.
“Thina njengesebenzi eZimbabwe siphakathi kosizi olukhulu, ngabe uhulumende uyanginanzelela, abami abantwana angenelisi ukuba ngibabhadalele imali yesikolo. Ngiyehluleka, akula okukujabulela.’’
Ilanga leWorkers Day liza ngesikhathi inengi labantu beZimbabwe lithola iholo eliphansi kakhulu, intengo yempahla ikhuphuka mihla ngemihla kulemithetho engabavumezi ukuba betshengisele.
IZCTU ithi abantu abangaba yisilinganiso sokuyisithupha ekhulwini - 60% eZimbabwe kabasebenzi isithi kumele uhulumende aphume lamacebo engadala imisebenzi elizweni.
Kwele Zimbabwe abantu abanengi bayehluleka ukukhuluma loba ukutshengisela besola iholo eliphansi kakhulu abalitholayo besesabela ukubotshwa.
Inhloko yalonyaka yokunanza leli langa ithi “Workers Demand an inclusive Zimbabwe free from poverty, corruption and opression.”
Forum