Ngemva kokungasekelwa nguzulu ngokuloba ayekwenze isisekelo sombuso esitsha ku Referendum ngoNhlolanja womnyaka ka 2000 lokubunjwa okwakusanda kwenziwa kwebandla elitsha eliphikisayo lilosekelo lwezisebenzi ele MDC, owayengumongameli Robert Mugabe wakhetha ukuthatha ama pulazi ngendlela yokuhluthuna kungela mbadalo esithi leli lilifa labantu okumele livikelwe.
UMugabe wenza lokhu esekelwa libandla lakhe leZanu PF, esola ibandla le MDC lomkhokheli walo umnumzana Morgan Tsvangirai ngokusebenzelana labamhlophe beveza lemifanekiso yakhe enikezwa imali yokusekela ibandla lakhe.
Unkosikazi Thabitha Khumalo umgcinisihlalo webandla le MDC-T uthi I-Zanu PF ayivezi iqiniso ngodaba lomhlabathi ngoba latshontsha amacebo abo. UMaKhumalo uthi kwakudingakala ukuba abensundu abathile befakwe emapulazini besebenzelane labamhlophe behlephunelane amapulazi bephanana lolwazi olungenza ukuba umsebenzi wokulima elizeni uthuthuke okwesabekayo labensundu bephuma kubuyanga kulalokho okwenzakalayo ethi indlela ekucebo labo ilakho ukuphathisa ikakhulu abasakhulayo.
Uthi sikhuluma kanje umhlabathi wanikezwa ngendlela elenkethabetshabi kutshiya inengi labantu lingelawo lawo mapulazi.
Umnumzana Admire Zaya osebenza labasakhulayo kuzakhamuzi ze Chutungwiza uthi abasemapulazini okwamanje badinga usekelo oluzwayo lokutholiswa indlela zokulima ngokuthelezela ,usizo lwemali yokuthenga okokulimisa okunjenge nhlanyelo imvundiso amathalakita kunye lezifundo zesiphangi phangi kwezokulima ukuze bethuthuke.
Umqondisi wenhlanganiso yabalimi bama pulazi amakhulu eye Commercial Farmers Union of Zimbabwe umnumzana Hendrik Olivier uthi sikhuluma kanje umumo emapulazini mubi abalimi bengasaqondisisi ukuba baya ngaphi bekhatheke ngokoma okukhona okusehlisa isivuno savo ngoba izilimo zisoma ngakwelinye icele besesabela ukuhluthunelwa njalo lawo ma pulazi.
Uthi abalimi abamhlophe babezinikele ukusekela kuminyaka yabo 1990 bevuma ukuthengisa amapulazi abo njalo bavuma ukunikeza amanye kuhulumende kulandela umhlangano ka 2000 kwatshiya amapulazi athile ekungwalo zabo sibalukhulu bezabelo zonke kunye lamakhulu enkulungwane zama hectares ukuze ehlaliswe uzulu kakutsha kodwa uhulumende wakhetha ukusebenzisa indlela yokuhluthuna lawo mapulazi. Ethi sikhuluma kanje kulabalimi abamhlophe abahlukunyezwa betshaywa abanye bebulawelwa abemuli, bethathelwa amapulazi abo asebedubeka okwamagama.
Abalimi laba bazama ngayo yonke indlela ukuba bethole inhlaulo baze bayakhweza indaba zabo emithethwandaba yenhlanganiso yomanyano wamazwe angezansi kwezwekazi leAfrica owe SADC Tribunal kodwa yacina ingenelisanga ukuphathisa kangako ngoba kweneliswe ukuhlaulwa abalimi abaphansi kwamakhulu amathathu phakathi kwenkulungwane ezedlula ezine ezidinga inhlaulo lalamhla lokhu njalo lalabo abatholayo babhadalwa ngedollar leZimbabwe elalingasela sisindo nxa liqathaniswa lemali yakwamanye amazwe.
Umnumzana Masimba Kuchera ocubungula ezombusazwe uthi uMugabe uzangena kumbali ekusimo esingalunganga ngenxa yodaba lomhlabathi.
Uhulumende wetheswa umlandu wokutshiya abantu abalezikhundla zaphezulu bezithathela amapulazi amahle santando, njalo kusetshenjiswa udlakela imithetho iguqulwa mahlayana, lesisekelo sombuso ukuze lokhu kuhluthunwa kwama pulazi kuqubekele phambili.
Okwamanje ilizwe kulokuthi libe lokudla okwenelayo ngoba umhlabathi ususezandleni zabensundu ilizwe libhekane lendlala enkulu ehlasela abantu abafika kuzigidi phose ezintathu njalo ligijigijima lidinga imali yokuthenga umumbu ngaphandle kwelizwe, lona kwakulilizwe elalimela umhlubulo wonke wangezansi kwezwekazi leAfrica leminye imihlubulo yaleli zwekazi.
