Abanye abakhokheli bebandla elibusayo eleZANUPF ezabelweni zeZimbabwe labanye ababengabalweli benkululeko bathi bafuna ukuthi uMongameli Mnangagwa angehli esihlalweni ngomnyaka ka 2028 njengokutshiwo yisekelo sombuso esithi kumele aphathe amahlandla amabili kuphela.
UMnangagwa emavikini ambalwa adlulileyo utshele uzulu esabelweni seManicaland ukuthi ufuna ukuyaphumula abeke intambo zombuso phansi ngo2028 kodwa abanye bathi angaphumi.
UMnu Richard Moyo umphathintambo wesabelo seMatabeleland North njalo engumgcinisihlalo webandla leZanu-PF kulindawo uthi uMnangagwa angayindawo ngoba ulethe intuthuko selokhe waphathayo kusukela ngo2018.
Owayengumlweli wenkululeko ekuviyo leZipra, uMnu Mathanda Scot Dube, uthi uMnangagwa engatshiyi isikhundla sakhe.
“Hayi asifisi ukuthi atshiye sifuna ukuthi asitshiye vele sesiright sifuna ukuthi aqubekele phambili asitshiye sesinikile okwethu, sithi aqubekele phambili nxa into zethu zingakalungi sizakuma ukuthi simtshele sihlale laye phansi, mdala salwa sisonkeni qhubeka uyephambili.”
Amazwi kaMnu. Dube agcizelelwa nguNkosikazi Viola Ncube.
Ubaba uMnangagwa sithi ED Pfee 2030, angaphumi kahlale ekhona. Thina siyahola ukudla njalo ilizwe lethu lilokuthula. Siyamthanda uMnangagwa sithi baba awuyindawo uze ukhokhobe esikhundleni sakhoKodwa uMnu Ngalo Ngalo laye owaye kuviyo Zipra ngesikhathi sempi yenkululeko uthi okwenziwa nguMnangagwa ayisikho abakulwelayo.
"Ayisikho lokhu esakuhambelayo empini mfanami amadoda laba hayi ayehluleka kungcono sibili astep down siboni ukuthi kungahamba njani because bayehluleka ukuyenza izinto khathesi abantwana abala msebenzi abala mali ezibhedlela akula mithi ah izinto zifile kuswelakale zonke izinto."
UMnu Guduza Mabhanga laye ukhala njengo Ngalo Ngalo
“Ngahamba empini khathesi angila lutho salwela ilizwe leli sithenjiswa into ezinengi nengi khathesi sekusidla abalutshwana layenalowu u Munangagwa senzela akuthandayo kasalandeli constitution uyafaka abazukulu imuli yakhe yonke ukhuluma ngokutshiya ngo2028 sesizisola ngokuthi sahambelani empini.”
Kodwa abanye bathi sokumele asuke esikhundleni. Osakhulayo
“Abantu abathabanga elizweni engumuntu ohlakaniphileyo uMnangagwa engayenzi ngobugovu ngokuthi ngumuntu oyisihwaba oligovu nga uyatshiya umbuso phansi ngoba ukuthi aqubeke esiya Phambili kuzamliza ngoba abafana bazamliza amasotsha are not happy ngendlela izinto ezenzakala ngayo.”
Ohlaziya ezombusazwe, uMnu. Rejoice Ngwenya, uthi labo abakhalela ukuthi uMnangagwa angatshiyi isikhundla badelela usapho lweZimbabwe.
Inengi lenkokheli yebandla leZanu-PF ezabelweni ezibalisa iMasvingo leMatabeleland North lentsha yalelibandla lithi lisekela ukuthi uMnangagwa aqhubeke engumongameli welizwe ngemva komnyaka ka2028 kuze kuyefika u2030 ukuze afeze umbono wakhe we-Vision2030.
Forum