Abalimi beMaNdebeleni sebekhuthazwe ukuba bathenge inhlanyelo evuthwa masinyane emavinkilini aziwayo alembali yokuthengisa ezokulimisa ezoqobo ukuze benqabele ukuthengiselwa inhlanyelo eyisiphamaso lokunye okokulimisa. Linkuthazo yenziwa ngalesi sikhathi abalimi belungiselela ukulima komnyaka ka2020 kusiya ku2021.
Ingcitshi ezibona ngezomumo womkhathi zithi lonyaka izulu liyathembisa ukuba lingana kuhle eZimbabwe, kodwa abalimi ikakhulu abemhlubulweni weMandebeleni okuvele kungani kuhle izulu bakhuthazwa ukuba bathenge inhlanyelo evuthwa masinya njalo beyithenge kumavinkili aziwayo awezokulima ukuze babelesivuno esihle.
Eyinye yalezi ngcwethi ongumqondisi wabalimisi kugatsha lwezokulima esigabeni seMatabeleland North, uMnu Dumisani Nyoni ukhuthaza abalimi ukuba bangayengwa yintengo ephansi eyabithengiswa ngayo ngabantu abathengisela phandle kwamavinkili aziwayo.
“Sekuyisikhathi sokulungiselela okuqinileyo esizakulima sikufuye ngomnyaka ka2020-2021 izulu seliseduze nanku sekuke kubelemikhizo. Ukuze sithole isivuno esihle kumele sibelenhlanyelo eqondileyo elohlonzi, ethembekileyo lehambelana lomango lapho olima khona umasikhangela eMatabeleland asilimeni inhlanyelo ezivuthwa masinya. Sikhangelele ukuthola izulu elingcono emavinkilini singayibona idula kodwa asinanzeleleni ukuthi ngalesi isikhathi kuba lezigangi ezihuqa umumbu esiphaleni ziyewuthengisa phandle kwamavinkili. Asiqapheleni lokhu singayengeki ngentengo ephansi.”
UMlimi uMnu Maluba Mhlaba uthi abalimi lonyaka basengozini yokuthenga inhlanyelo ethengiswa phandle kwamavinkili ngoba eyemavinkilini iqanse okwethusayo.
“Ngilesimanga esikhulu kakhulu ngendaba yokuthi inhlanyelo ikhwelile yaya kuUSD$35 per 10kg, ngubani ozenelisa ukuyithenga njalo ngubani oyiholayo lokhu kukhombsa ubunzima. Ukuze ubele$35 uyabe untshintshe amadola anganani. Lobu yibunzima osebubhekane lozulu emakhaya yinhlamba leyo.”
Amavinkili athengisa okokulimisa abiza amatshumi amathathu lanhlanu amadola eMelika-US$35, umgodla wamakilogram alitshumi-10kg. Kuthi ngedola leZimbabwe ibiza inkulungwane ezinthathu-ZW$3,000, emgodleni we10kg yomumbu. Abalimi bathi umvundiso lenhlanyelo yamazambani akukatholakali okugoqela leyamabele amancane.
Kuminyaka emibili emithathu edluleyo ilizwe belibhekane lendlala ngoba izulu belingani kuhle, okutshiye inengi lisebunzimeni kuthi izifuyo lazo zicuba zingela madlelo lamanzi. Kunje abalimi abanengi sebeqalile ukuphendula lokulungiselela umsebenzi wokulimela umnyaka ka2020 kusiya ku2021.
