Abalimi bezigabeni zemaNdebeleni sebeveze ukukhathazeka ngokumemetheka komkhuhlane wenkomo owamasondo oweFoot and Mouth besithi lanxa uhulumende esithi ulwisana lawo, inkomo zabo ziqhubeka zihlaselwa njalonje.
Umkhuhlane lo uqhamuke ezigabeni zeMandebeleni, Masvingo leMidlands nyakenye. Lanxa uhlangothi lukahumende olwezifuyo lwamisa ukuthengiswa kwenkomo zakulezizigaba ngoMabasa lonyaka kukhanya ulokhu uqhubeka usiya phambili.
Ofuyileyo, uMnumzana Matewu Jiyane, owesiqintini se Insiza uthi bona ngabafuyi benkomo kungakho bakhathazekile ngoba lumkhuhlane ngani uzatshaya uqothule izibaya zisale ziphephetha umoya ngoba ulokhu umemetheka.
Uthi babona angani uhulumende kananzeleli ukuthi loludubo lukhulu ngoba inkomo ezivelela esiqintini seMberengwa okulalumkhuhlane ngamandla ziqhubeka zihamba yonke indawo zithelela ezabo lumkhuhlane.
Osakhulayo esiqintini lesi, uMnumzana Ngqabutho Gumede, uthi udubo lwalumkhuhlane lwengezwa yikuswelakala kwamadibha kulesisiqinti. Wengeze esithi nxa kungadingwanga imithi yokwelapha inkomo, zizaqhubeka zithelelana ngoba izakhamizi azilandlela zokuvikela izifuyo zazo.
Umnumzana Makhosonke Ncube yisakhamuzi koSkhobokhobo eNkayi. Uthi phezu kwalumkhuhlane owavelela esigabeni seGokwe, bebevele bebhekane lodubo lwenyamazana zendle ezithelela inkomo zabo imikhuhlane etshiyeneyo. Inyamazana lezi ezivelela endaweni ezigcina inyamazana eHwange, uthi ziletha imikhuhlane etshiyeneyo okubanzima ukulwisana layo kungelamadibha aneleyo.
Umkhuhlane lo ubikwa umemetheka okwethusayo, okokuthi kuhlaselwa inkomo ezingamatshumi amabili ngelanga ngenxa yokusilela kwemithi kuhulumende.
Umsekeli kamphathintambo wezokulima uMnumzana Paddy Zhanda yena uphume emaphephandabeni esithi akunjalo, baphezu kokuwuqeda lumkhuhlane, abalimi bengahlaleli evalweni.
Umkhuhlane lo awuqali ukuqhamuka kulezizigaba, utshona uqhamuka njalonje okwenza kuminyaka elitshumi lanhlanu kumiswe ukuthengiswa kwenyama yakuleli emazweni aseEurope.
Izibonakaliso zalumkhuhlane yizilonda emlonyeni lasemasondweni enkomo, ukuqhula kanye lokuqhuqha enkomeni eyabe isihlaselwe.