Abanye abasakhulayo abakumsebenzi wokuthapha izindaba eZimbabwe sebesungula inhlelo zemfundiso ngomkhuhlane weCoronavirus wona osuthethe imphefumulo yabazinkulungwane ezilikhulu lamatshumi amabili emhlabeni wonke jikelele.
Omunye wabo nguNkosikhona Dibiti osungule uhlelo lokusakaza nsuku zonke emskazweni wenkundleni zokuqxhumana ezebulenjini kuFacebook lakuWhatsapp oweCommunity Podium TV, koBulawayo.
Ekhuluma ngokuqhakatheka komsebenzi wabo njengenthathelezindaba, ngalesi sikhathi ilizwe lilwisana lokuvimba ukusabalala lokuthelelanwa komkhuhlane weCoronavirus, uDibiti uthi bacabange ukusungula lumsebenzi ngoba sebenanzelele ukuthi inengi labantu elizweni jikelele ikakhulu emhlubulweni weMaNdebeleni alila lwazi olweneleyo ngalumkhuhlane.
“Ngike ngakhuluma labafana ababili abathathu, bangitshela ukuthi iCorona ngeyamazweni. Bona bahlala lapha abazake baphume elizweni, kutsho ukuthi iCorona ayilani labo. Khonakhana nje kusitshengisa ukuthi umsebenzi usasemkhulu,” kutsho uDibiti.
U-Dibiti utshele uMike Hove oweStudio 7 ukuthi kuhlelo lwakhe lomsakazo weCommunity Podium TV, uthi baxoxa ngendaba ezehlukeneyo ikakhulu inhlupho ezibhekane labantu ngalesi sikhathi sokuzama ukulandela iziqondiso zokuvimba ukuthelelanwa kwegcikwane leCoronavirus, kodwa ngasikhathi sinye bezama ukuselela imuli khona kulohlupho lokusilela kwamanzi, imphuphu lokunye koBulawayo.
“ICity Council isideclare inational disaster endabeni yamanzi so amanzi kawatholakali. Sikhuluma nje besibona abantu bethwele ama bucket bevela emanzini, akula social distancing. Eziboraneni lezi abazali bayathuma abantwana. Lathi sesicabanga ukuthi abazali bayazwisisa yini umumo esikuwo. Ngeke sithumele abantwana nje, beyohlangana labantu ngoba yibo abazasilethela umkhuhlane lo ezindlini,” kutsho uDibiti.
Sebelitshumi lasikhombisa (17) abantu beZimbabwe asebehlolwe bafunyanwa belomkhuhlane weCoronavirus. Abathathu babo sebehle babulawa yiwo.
