Abasakhulayo bathi bayasisekela isinqumo esithethwe nguhulumende sokuya kuzinga eliphezulu lohlelo lokuvalelwa kwabantu ukuthi bengahamba hambi, olweCOVID-19 level 4 Lockdown, njengendlela yokwenqabela ukumemetheka kwegcikwane leli elizweni.
Omunye wabo nguMnu. Nkosikhona Dibiti, yena othi lanxa esamukela isinqumo esithethwe nguhulumende, silakho ukuphazamisa impilo zabatsha ikakhulu labo abazisebenzayo ngoba bengazi lokuthi bazakwenelisa ukuziphilisa njani okwenyanga yonke.
“ULevel 4, usikhumbuza ngesikhathi lapho okwaqhamuka khona umkhuhlane weCoronavirus ngoMarch odlule. Engikunanzelele yikuthi ngoDecember sike saba busy kakhulu njengelizwe, abantu bahlangana lezihlobo zabo, bekulemitshado lemicimbi etshiyeneyo, yikho osekwenze ukuthi inani lababanjwe ngalumkhuhlane likhuphuke,” kutsho uDibiti.
UDibiti uphinde wathi uhlelo lweCOVID-19 level 4 Lockdown lizaphazamisa impilo zabatsha abanengi elizweni ngenxa yokuthi inengi labo liyenza imisebenzi yezandla.
“Ezabatsha khona kunzima because mostly I hustleprenuership leyana eyokuthi we are living from hand to mouth akwenzi phantsi kwaloluhlelo. Imali kade ebesilayo yiyo esisebenzise ngesikhathi sekhefu lekhisimusi, now immediately sekusiba ngelockdown, eish it is hard,” kutsho uDibiti.
Omunye ophe umbono wakhe nguMnu. Blessing Phiri, usomabhizimusi osakhulayo, wenkampani yeDonMinteiro, ethengisa impahla etshiyeneyo, egoqela ama suit kanye lezichathulo zabesilisa.
UPhiri laye ulombono munye loDibiti. Yenake ucela uhulumende ukuthi angenele kuloludaba ngokusiza osomabhizimusi abasakhulayo, ngesikhathi ilizwe likuLockdown, njengoba inengi labo lingasoze lenelise ukusebenza lizinakekela.
“Ngibona ngani into esiyidingayo njengabosomabhzimusi abasakhulayo, lusizo eluvela kuhulumende, ukuthi esisize ngama stimulus packages ukuthi siyenelise ukuphenduka lathi back to our feet, size siqhalise iproduction, so sifuna usizo oluvela kuhulumende njengalokho okwenzakalayo kwamanye amazwe,” kutsho uPhiri.
