Izakhamizi zakoBulawayo ziveze imibono ehlukeneyo mayelana lempumela yophenyo olusedale lephalamende olohlangothi lukahulumende lwamapension olweNational Social Security Authority oluveza ukuba kulezigidi ezedlula ikhulu lamatshumi ayisikhombisa zamadola ezatshaphazwa kumisebenzi yenkohlakalo nguMphathintambo wogatsha olwaluphethe loluhlangothi, uNkosikazi Prisca Mupfumira, ibhanga leMetbank lamankampani athile.
Inengi labantu abakumpentsheni bakhala ezimathonsi ngoba imali abayiholayo ayeneli ukugada besuka emakhaya bezothatha lezo mali emabhanga asedolobheni.
Inengi labo aliholi ngesikhathi njalo bavame ukulala belindile emabhanga ukuze bathole incosana abayabe bethe bayifakelwa.
Isakhamuzi sakoBulawayo, uMnu Thomas Sithole uyakusola kakhulu ukwenza kwabeNSSA kanye lokutshaphazwa kwemali kazulu engaka.
UMnunzana Effie Ncube uthi isizwe sesifile nya ngenkohlakalo akumelanga kuvunyelwe okunje.
“Isiwe sakithi sesife saphela du ngenxa yecorruption angithi uyabona ukuba abantu abathethe umhlalaphansi bebethwelenzima bengatholi izimali kanti iyadliwa yiNSSA yiMinistry yeSocial Welfare okumele igcine abantu asebethethe umhlalaphansi. Kuyinto embi kakhulu engafanelanga ivunyelwe esizweni noma yisiphi emhlabeni .''
UMnu. Stanley Ndlovu uthi ngesikhathi ebhadala impentsheni esasebenza ubeyibhadala ngedola leMelika.
“Ngesikhathi sikhupha imali yempentsheni sisasebenza sasiyikhupha ilidola leMelika kodwa manje sebesibhadala i$80 bond note encane kakhulu sicela iNSSA ilungise loludaba.''
UMnu David Moyo uthi sebephila nzima njalo kabaphathwa kuhle lapho bedinga ingcazelo kwabeNSSA lasemabhanga.
“Imali asiyitholi emabhanga bathi sisebenzise imali ebulenjini, basiphatha kubi njalo thina imali yethu sayikhupha ilidola lemelika kodwa sebesipha imali yebond note engelasisisndo, abafelokazi bathola amatshumi amathathu amadola.''
Isakhamuzi sakoBulawayo, uMnu Tsepo Nare uthi ulusizi ngokulahleka langokutshaphazwa kwemali enkulu kangaka.
“Imali elahlekileyo akusimali yokudlala,kungabe kungethusi kubandla elibusayo kodwa imali esetshenzwa ngabazali ukuthi idliwe mahlayana kuyethusa yikuthi abantu abazi ukuba bakhetha abahuquluzi abanganaki uzulu. "
UMnu Osca Nyathi uthi ibandla elibusayo alimanga lapha ekuhuquluzeni imali yabadala.
“Into eyenziwe yilesisiphathamandla kulusizi ngoba abadala bayisebenza nzima limali, ibandla elibusayo lithatha imali yabadala besungula amabhizimusi, futhi beyithatha ilidola lemelika sicela abadala bephiwe izimali zabo "
Okwamanje uNkosikazi Mupfumira ulokhe evalelwe esigodlweni kulandela ukuphuma kwaloluphenyo ukuba achaze ukuthi kwahamba njani ngemali yabadala eyeNSSA abangasayitholiyo emabhanga njalo sebeyiphiwa ilibond note hatshi idola leMelika njengokuyikhupha kwabo besasebenza.
Abadala abanengi balala emabhanga belinde ukuphiwa imali kuthi ngezinye insuku bengayitholi ngemva kokulala belindile, abanye bavele abayithola lobanje babebhadalakuhle eNSSA.
