Abantu abakhubazekileyo bathi ukuguquka komkhathi okubizwa ngeSilungu ngokuthi yi-climate change kubathwalise amagabha avuzayo ngesikhathi bezama ngamandla wonke ukulwela amalungelo abo.
Abacubungula ezokuthuthuka kukazulu bathi ukuguquka komumo womkhathi kunciphisa amathuba abantu abakhubazekileyo. Kubathwalisa nzima ekutholeni ukudla, ukukha amanzi lokwenza eminye imisebenzi.
Omunye wabakhubazekileyo, uNkosazana Tariro Gurure, uthi babhekane lenhlupho ezinengi ngenxa yokukhudumala komkhathi.
“Kodwa uhulumende ulomlandu wokuthi agcine abantu abaswelayo labaswelisisayo esingathi yi-community ngesiNgisi, kucine kuphiwa imali leyi esuka kuSocial Welfare."
Umqondisi wenhlanganiso yeDisabled Women Support Organisation njalo ongumgcinisihlalo wenhlanganiso yeNational Disability Board, uNkosikazi Loveness Sibanda, uthi kunengi abakwenzayo okunceda abakhubazekileyo ababhekane lokukhudumala komkhathi.
"Siyabe sifundisana okuqakathekileyo okufana lokusebenza ukuthi lathi sizenzela ukuba lathi sibe empowered siyenze amabhisiness atshiyeneyo. Okuhluphayo kunengi kodwa konke lokhu kungaba kukhona, asizamenini ukuthi lathi siqine, sibedlule sibe phambili.”
UMnumzana Nyasha Nhau, owakhethwa ukuba ngummeli wabakhubazekileyo kunhlanganiso yomanyano wamazwe akuzwekazi leAfrica eyeAfrican Union Disability Ambassador omela isigaba seZansi yezwekazi leAfrica, uthi abakhubazekileyo babhekane lobunzima bokukhudumala komkhathi ngesikhathi belwela amalungelo abo atshiyeneyo.
“Kulemiphumela yendlala, abale-albinism basengozini yemvukuzane ngenxa yokutshisa kakhulu. Lezi ngezinye zezinto abantu abakhubazekileyo ababhekana lazo.”
UNkosazana Kundai Ngwena, owakhethwa ukuba lilunga leAfrica Union 4th General Assembly Member ekhangela uhlangothi lwezokuguquka komumo womkhathi, uthi bebevele bebhakane lenkinga ezinengi abakhubazekileyo kusukela kudala.
“Bona bevele bengelawo amathuba. Kusukela manje kumele babe semqondweni laba bantu, kube yibo abahamba phambili uma kukhulunywa ngenhlelo ezitshiyeneyo zokusiza abantu.”
Umanyano wamazwe omhlaba oweUnited Nations ukhuthaza ukuba abakhubazekileyo banakekelwe ngesikhathi sokukhudumala komkhathi njalo bephatheke kunhlelo zonke ezenziwa nguzulu. Umanyano lo uthi kusobala ukuba abakhubazekileyo abanengi bayaswela kakhulu okwenza isimo sabo sibe sibi ngesikhathi kuqhubekela phambili ukukhudumala komkhathi
Forum