Ikhansili yakoBulawayo isiqale ukuqhatsha abongi ngobunengi, abasebenzela emakilinika ayo ngemva kokuba izakhamizi zesihlabe omkhulu umkhosi ngokuqeda isikhathi eside zisemtholampilo ngenxa yokusilela kwabongi.
AbakaManisiphala bakhuphe umbiko othi ibadinga ukuqatsha abongi abangaba ngamatshumi amahlanu (50) ukuze behlise ububi besimo esesikhona emtholampilo ekhangelwe yikhansili.
Unkosikazi Sanele Ndlovu omunye wabasakhulayo osanda kugqiba izifundo zokuba ngumongi uthi ikhansili aluba iyaqatsha umuntu wonke ingafaki imigoqo yokuthi ifuna asebeke basebenza iminyaka emibili.
"Silokujabula ngoloku okwenziwe yikhansili kodwa isifiso sethu ngesokuthi aluba bayaqatsha kuphela labavela esikolo kungakhethile iexperience bengeze lenani abalifunayo njalo bame lesithembiso abathe bazasenza.”
Unkosikazi Khethiwe Tshuma uthi lanxa kulinyathela elihle kumele kuqale kulungisiswe okudala ukuba kube lokusilela kwabongi elizweni.
“Khona kulicebo elihle eliyenziwe yikhansili kodwa siyezwa inengi labongi liyahamba emazweni ukuthi liyephila impilo engcono lapha nxa sebefuna ukuqatsha abanye kuyini okuzakwenza bahlale iholo liphansi okuyikho okumele kwenziwe kuqala akulungiswe iholo ukuze labo basebenze bekhululekile yikho esikukhalela kakhulu.”
Unkosikazi Nomsa Phakathi isakhamuzi seNkulumane uthi inengi labomama alisahambisi abantwana ekhilinika ngoba beqeda ilanga lonke belayinile.
"Singananzelela izinto ezinengi sezatshintsha kodwa esikubonayo yikuthi sekuvalwa ngokuthi yiCOVID ikanti akulamanurse. Omama abanengi abasahambisi abantwana kubaby clinic abanye bebalekela ukutshona behlezi eclinic belokhe betshova iline isizatho kuyikuthi balutshwane abongi njalo abantu bahamba ngokutshiyeneyo.”
Imizamo yokuxhumana leziphathamandla zeKhansili yehlule ngoba bezilokhe zisemhlanganweni. Kodwa embikweni okhutshwe yikhansili bathi bayaqatsha abongi abangamatshumi amahlanu (50) njalo bezakwengeza lezinto ezizabanceda ukuziphilisa kulabo abayabe bephumelele ukuqatshwa kutsho uTown Clerk Christopher Dube.
Ikhansili ilamakhilinika aphose afike amatshumi amabili (19)l lesibhedlela esisodwa. Umnyaka ophelileyo uhulumende esebenzisa ugatsha lwezwempilakahle wabika ukuthi uzathatha izibhedlela ezingaphansi kwamakhansili ukuze zisebenze kuhle.
