Abahlali bakoBulawayo bathi bayakwamukela ukubunjwa komthetho ozakwenza kube lekhomishini yokuphenya amacala okuhlukuluzwa kwabantu elizweni. Kodwa abanye bathi umthetho lo kumele uphawule ukuthi ngobani abazakuba ngamalunga aleyokhomishini njalo abafakazi bazavikelwa na.
Ikhomithi yedale lephalamende ebona ngezomvikela ibiko Bulawayo ngoLwesibili iqhuba lumhlangano, lapho abaphatheke kuwo abathe kubalulekile ukuba ikhomithi enjengaleyi izimele yodwa ukuze kube lokwahlulelwa okungela bandlululo.
UNkosikazi Patricia Tshabalala olwela amalungelo oluntu ugcizelele lumbono.
UMnumzana Shelton Sugar Tenno osakhulayo uthi abatsha kumele bephiwe ithuba lokuphatheka kukhomishini ebunjwayo.
UNkosikazi Sukoluhle Mhlanga omela abakhubazekileyo, ekunhlanganiso yeWomen Coalition of Zimbabwe uthi abakusimo esifana lesakhe kumele bephatheke kule imihlangano ngoba labo bezithola bephakathi kokuhlukuluzwa emphakathini.
UMnumzana Levi Mayihlome, owayeyisiphathamandla sebutho, njalo engumgcinisihlalo we komiti ye Defense, Home Affairs and Security Services uchaza injongo yabo ngalumhlangano.
Uqhubeke wathi abantu yibo okumele batsho imibono yabo umthetho ungakabunjwa.
Imihlangano le iyaqhubeka elizweni jikelele njalo abanye sebegcizelele ukuthi kufanele ikhomishini ezabunjwa icubungule ukuhlukuluzwa kwabantu kusukela kudaba lweGukurahundi kuze kube lanamuhla.
