UNkosazana Charmaine Mapimbiro, umculi odabuka eZimbabwe odume ngegama lokucula lokuthi ngu“ShaSha” ehlabela umdumo we- Amapiano, uthole umvuzo kumncintiswano womsakazo kamabonakude weMelika, oweBET . UShasha othole umvuzo owe‘Best New International Act.’ ngumculi wakuqala odabuka eZimbabwe othola isicoco esinje.
Umncintiswano lo wama BET Awards, ngophathelane lezemidlalo yokulingisa kanye lomculo wabensundu, abadabuka emazweni atshiyeneyo, emhlabeni jikelele.
Lonyaka uShaSha ubencintisana labaculi abadumileyo, abagoqela uRema waseNigeria, uStacy waseFrance, Young T and Bugsy, abadabuka eNgilandi labanye. UShaSha ulengoma ezidumayo ezinjengabo Tender Love, Mutare lezinye.
Ingcwethi kwezamasiko, umculo kanye lezemidlalo zithi ziyaziqhenya ngokuphumelela kukaShaSha. Omunye wabo nguCal_vin, umculi womdumo weHipHop kweleZimbabwe, yena otshele umsakazo weStudio7 ukuthi ukuphumelela kukaShaSha kulakho ukwenza ukuthi abaculi baseZimbabwe bamkelwe emazweni atshiyeneyo emhlabeni jikelele.
“Ngilethemba lokuthi wonke umuntu usezaqalisa ukudingisisa ukuthi kahle kahle umuntu lo uphumaphi, uvela eZimbabwe, uvela eZimbabwe kulabobani? Okwesikhathi eside besikhangelelwa phantsi kakhulu ngendaba zamapolitics lezi, so uku wina kwakhe ngempela kuzayenza ukuthi abantu basikhangele ngendlela enstha in a beautiful way,” kutsho uCal_vin.
Abafisa ukuthenga ingoma zika ShaSha kanye labafisa ukuxhumana laye lilakho ukuxoxa laye ebulenjini bokuxhumana obeTwitter kanye lakuInstagram, iusername yakhe ngu @shashaofficial1.
