Inhlanganiso ye Zimbabwe Divine Destiny isikhuthaze umongameli Emmerson Mnangagwa lenkokheli yebandla lakhe leZanu PF ukuthi belandele isibonelo salowo owake wakhokhela abasakhulayo kulelibandla uMnu. Jim Kunaka, bavume amaphutha abawenza kumalunga amanye amabandla ezombusazwe ukwenzela ukuqeda ukufuthelana elizweni.
Inhlanganiso le yethule linkuthazo emhlanganweni lentathelizindaba emahofisini ayo eHarare, owokwethula umbono phezu kokwavezwa nguMnu. Kunaka lapho atshela ikomishini eqhuba umsebenzi wokudingisisa ngokudutshulwa kwabantu okwenzakala mhla ka 1 kuNcwabakazi edolobheni le Harare.
Umqondisi wenhlanganiso le, uBishop Ancelimo Magaya uthi liyancomeka inyathelo elathathwa nguMnu. Kunaka ngoba akukaze kube khona owebandla leZANU PF oqunga isibindi ukuchaya egcekeni imisebenzi yalelibandla esexotshiwe.
UBishop Magaya uphinde wakhuthaza uMnu. Kunaka ukuthi aphenduke emisebenzini emibi, azinikele enkosini yesiKhristu uJesu.
Kusenjalo, abafundisi bathi kuqakathekile ukuthi bakhokhele inhlelo zokukhumisana umlotha ukuze ilizwe libe lokuthula. Lokhu bakukhulume ngemva kokuzwa ubufakazi bobunzima obehlela abantu ngesikhathi sombuqazwe weGukurahundi ilizwe lisanda ukuthola uzibuse.
Umhlangano lo ubuqoqwe yinhlanganiso yeCentre for Study of Violence and Reconciliation, ibambane le National Transitional Justice Working Group. Abaphe ubufakazi bakhulume ngokubulawelwa izihlobo, ukudlwengulwa kwabesifazane kanye lokutshiselwa izindlu lempahla zabo.
UReverend Ray Motsi uthi ibandla lilomlando wokungenela endabeni ezinje, ngoba yikho okutshiwo libhayibhili.
UApostle Pertunia Chiriseri, ongukhomishina we Zimbabwe Human Rights Commission uthi kufanele abantu behlawulwe ngoba balahlekelwa kakhulu.
Omunye wabafundisi uReverend Obert Shatai uveze ahlangana lakho ngemva kombhuqazwe ngesikhathi ethunywe ukuyatshumayela eMbembesi kodwa engalwazi ulimi lwesiNdebele. Ngakho uthi walufunda ukuze axoxisane kuhle labantu.