Abalwela amalungelo abasakhulayo sebamukele isixwayiso sikamahluli weHigh Court koBulawayo esokuthi uhulumende kumele asungule uluhlu lwamabizo abantu abayabe betholakale belecala lokudlwengula.
Ekhuluma ekuvulweni kweHigh Court eGweru uJustice Martin Makonese uthe ukubhaliswa kwezigilamkhuba lezi kuzaphathisa ekulwisaneni lokudlwengulwa kwabantwana, khona okuqhubeka kuqonga elizweni.
Abasekela umbono kamahluli lo bathi ngempela abadlwenguli kumele bazakale.
Bathi njalo lokhu kwenza kube lula emapholiseni ukuthi balwisane lamacala anje.
Kodwa abanye bathi okudingakalayo yikuthi umthethwandaba wethese abadlwenguli izigwebo ezilukhuni.
Ummeli wedale lephalamende uNkosazana Thabitha Khumal ,yena oseke waphatha loludaba ephalamende, utshele iStudio 7 ukuthi uyayisekela imbono kaMakonese.
