Ababalisi lezifundi bathwele nzima ngezifundo ezintsha ngenxa yokusweleka kwengwalo kanye lokwanda kokumele bakwenze.
Lokhu kuvezwe yikomithi ebona ngezemfundo edale lephalamende eyethekelele izikolo ezimbalwa ko Bulawayo ihlolisisa ukuthi izifundo ziqhutshwa njani phansi kwe curriculum entsha.
Omela isigabe seMakhandeni edale lephalamende uMnu. Dingilizwe Tshuma uxoxe leStudio 7 ngemva kohambo lwabo lolu ethi amatitshala abalise inhlupho ezinengi kakhulu ezigoqela ukuthi ingwalo kanyo lokunye okudingakalayo akukho ezikolo.
UTshuma ugcizelele wathi ababalisi kanye labafundi abenza izifundo zezinga eliphezulu- (secondary sducation) bathi umsebenzi osukhona ngenxa ye-curriculum leyi usumnengi kakhulu ethi abafundi kumele benze amaproject ezikolo ngesifundo ngasinye ethi lokhu kuyasinda ababalisi okumele bamake labafundi okumele babhale lawo maproject. Abafundi kufanele njalo babhode emakhampanini lakwezinye indawo bedingisisa ngamaproject eyama izifundo zabo kodwa lokho kukhanya kubafaka engozini ikakhulu abantwana abangamankazana.
Umbalisi ofundisa eSikolo esikoBulawayo Unkosikazi Sihle Mloyi uthi bayajabula kakhulu ukuthi sebethole ithuba lokukhulumisana lelunga ledale lephalamende ethi lokhu linyathelo ilethembisa ukuthi mhlawumbe kungatshintshwa indlela izinto eziqhutshwa ngayo.
Umzali oyisakhamuzi seMpopoma unkosikazi Nobukhosi Ncube uthi laye uyajabula ukuthi athole ithuba lokuxoxisana lelunga ledale lephalamende ethi mhlawumbe kuzaletha utshintsho.
Impumela yalolo phenyo olwenziwe ngamalumga edale lephalamende luzahanjiswa ephalamende ukuyahluzisiswa ukuthi kungenziwa njani ukuthi umthwalo lo ubenganeno ebabalisini lakubafundi.
Selokhe lwaqala ukufundiswa ezikolo ingwalo azitholakaIi njalo ababalisi abanengii abazange bathole ithuba lokufuna iNew Curriculum leyi. Yona yaqala ukusentshenziswa ngomnyaka ka 2016.