Ilunga lebandla leMthwakazi Republic Party, uMnu. Mkhululi Jele owabotshwa ngenyanga edluleyo esikolo sePhakamani High School ePlumtree ngemva kokutshengisela kwabantwana besola ukufundiswa izifundo ze heritage studies ukhululwe ngoLwesithathu ngemali yesibambiso eye bail ngumantshi wePlumtree.
Umantshi walile isicelo samagqwetha kaMnu. Jele esokuthi icala aletheswayo lichithwe namuhla, ngakho uzaphindela emthethwandaba wePlumtree ngoLwesibili mhlaka 11 ngeviki ezayo.
UMnu. Jele, ongumkhokheli wogatsha lwabatsha kubandla leMRP elikhokhelwa nguMnu. Mqondisi Moyo, wetheswa icala le “disorderly conduct at a public place” ngoba kuthiwa wangena ngemva kokutshaya umnyango ewofisini kamphathisikolo lapho abantwana ababikwa babevalelwe khona bebuzisiswa ngamapholisa ngesehlakalo sokwala ukufundiswa i heritage studies le, okubikwa ingahambelani lamasiko abo njalo ibafundisa ulimi wesiShona.
Kodwa uMnu. Jele uyakulandula lokhu esithi wayezibuzela nje ukuthi kungani abantwana babebuzisiswa abazali babo bengekho.
Igqwetha lakhe uMnu. Thuto Mavula uthi bakhalaza i bail ngokuphuthuma ngemva kokwalelwa ukuthi icala leli lesulwe. Usichasisela okwenzakale emthethwandaba.
Forum