Amagqwetha amela umholi wogatsha lwabatsha kubandla leMthwakazi Republic Party, uMnu. Mkhululi Jele owabotshwa kumaviki amabili edluleyo esikolo sePhakamani High School ePlumtree ngemva kokutshengisela kwabantwana besola ukufundiswa izifundo ze heritage studies athi ngoLwesibili akhalaze umthethwandaba ukuthi alahlele khatshana lelicala.
UMnu. Jele, ozaphindela emthethwandaba kamantshi ePlumtree ngoMvulo ozayo, wetheswa icala le “disorderly conduct at a public place” ngoba kuthiwa wangena ngemva kokutshaya umnyango ewofisini kamphathisikolo lapho abantwana ababikwa babevalelwe khona bebuzisiswa ngamapholisa ngesehlakalo sokwenqaba ukufundiswa i heritage studies le, okubikwa ingahambelani lamasiko abo njalo ibafundisa ulimi wesiShona.
Kodwa uMnu. Jele uyakulandula lokhu esithi wayezibuzela nje ukuthi kungani abantwana babebuzisiswa abazali babo bengekho.
Igqwetha elimela uMnu. Jele, uMnu. Thuto Mavula uthi abantu baze ngobungi babo emthethwandaba njalo bebegoqela abazali, amakhansila, amalunga e-MRP, abezombusazwe, lamanye amalunga omphakathi.
Uthi amapholisa aqale akhonona ngalokho, kodwa kawathathanga inyathelo ngoba kungasocala ukuthi umthethwandaba ugcwale abantu.
“Baze ngobunengi babo ngoba lolu akusodaba lukaMnu. Jele kumbe i-MRP, ludaba oluthinta umphakathi…ludaba olusegudwini,” kugqiba uMnu. Mavula.
Forum