Intengo yempahla egoqela ukudla, amafutha emota lokunye yaqhubeka ikhuphuka eMelika ngoZibandlela. Intathelizindaba yeVOA uVeronica Balderas Iglesias uxoxa lengcwethi zenotho ngokungenziwa nguhulumende kaTrump ukuze ehlise intengo yempahla
Umbiko wohlangothi lukahulumende weMelika olubona ngezisebenzi uveza ukuba intengo yempahla yakhuphuka ngesilinganiso sokuthathu ekhulwini ngoZibandlela nxa iqathaniswa lanyakenye. UNkosikazi Allison Schrager owekolitshi leManhattan Institute uthi intengo yempahla iyakhwela.
“Amarent aqhubeka ekhuphuka. Intengo yempahla ibisehla ngemva kokuphela komkhuhlane weCovid kodwa ukwehla kwentengo sekumile.”
Ofundisa izifundo zenotho eMontclair State University, uSikhwicamfundo Edmond Berisha laye uphe umbono wakhe.
“Inani labantu abangela misebenzi liphansi, okutsho ukuthi abantu bahola imali ngakho bayayisebenzisa ukuthenga impahla okuyikho okwenza intengo yempahla iqhubeke iphezulu.”
Laloba ingcwethi zisithi umongameli Donald Trump wathola umnotho uqhuba kuhle, yena upha owayengumongameli uMnu Joe Biden umlandu wokutshiya intengo yempahla ikhuphuka.
“Lokhu kwabangelwa nguBiden. Ngakhokhela okweminyaka emine intengo yempahla ingakhuphuki.”
Ingcwethi yezomnotho uNkosikazi Allison Schrager uthi ezinye inhlelo zikahulumende kaTrump zilakho ukuthuthukisa umnotho.
“Ukwehlisa imithelo yamankampani lokumisa eminye imithetho yezenotho kulakho ukuthuthukisa umnotho welizwe.”
Abathengi abakhangelelwanga ukuphathiseka kudaba lwama- interest rates, kodwa zikhona ezinye indlela ezingasetshenziswa ukwehlisa intengo yempahla kutsho uMnu Edmond Berisha
“Kumele kusekelwe inkululeko yemikambo. Okunye esikufunayo yikuthuthukisa ukulungiswa kwempahla.”
UMnu Berisha uthe ukukhuphuka kwentengo yempahla kuyinto eyenzakala emazweni omhlaba, njalo amanani aveza ukuthi umnotho weleMelika ulokhu uqhuba kuhle.
Udaba lolu luqoqwe yintathelizindaba yeVOA uVeronica Balderas Iglesias, lalwethulelwa yimi uTaboka Ncube oweStudio7.
Forum