Umqondisi wenhlanganiso emela izisebenzi emhlabeni jikelele eye International Labour Organisation (ILO) uMnu Gilbert Fosson Houngbo uthi kumele kube lokukhulumisana phakathi kuka hulumende, abaqhatshi, lezisebenzi zakhe ukuze eleZimbabwe lenelise ukuqeda ukungalinganiswa kwendlela zokuziphilisa. Ekhuluma emhlanganweni oqhubeke eHarare, uMnu Houngbo uthe lobanje ele Zimbabwe libhekane lendubo zomnotho kusobala ukuba uhulumende uzama ngazo zonke indlela ukulungisa okuhluphayo.
Uthe ukuze kube lokuzwanana phakathi kuka hulumende lezisebenzi zakhe kumele kube lokukhumisana umlotha.
Uqhubeke wathi phakathi kwamazwe wonke asemhlabeni, amazwe akuzwekani le Africa yiwo alokungalinganiswa kwamathuba okubangela ukuba kube lomehluko omkhulu phakathi kwabaswelayo labatholayo.
Uthe ukwehlukaniswa kwamathuba emhlabeni jikelele kwengezwa lubhubhane lwe COVID-19 ndawonye lokusetshenziswa kwemitshina yakulezi nsuku osekwenza amanye amazwe asalele emuva.
UMnu. Houngbo uthe uhambo lwakhe lolu lumenze wabona ukuba eleZimbabwe liyazama ukuthuthukisa umnotho walo lanxa kulemigoqo elibhekane layo efana lezijeziso zomnotho.
Ekhuluma kulumhlangano umphathintambo ka hulumende obona ngokuphathelane lezisebenzi uMnu. July Moyo uthe uhulumende ujabulele uhambo luka Mnu. Houngbo njalo uzathatha iziqondiso aziphiweyo.
UMnu. Houngbo ubuye kwele Zimbabwe izolo wahlangane lohulumende, izisebenzi labaqhatshi abenhlangothi ezehlukeneyo efuna ukuzwisisa ukuba basebenzelana njani kuleli.
Omunye ophatheke emhlanganweni lowu emele izisebenzi engu Nobhala we Zimbabwe Congress of Trade Unions (ZCTU) uMnu Kudakwashe Munengiwa uthe umhlangano lo lohambo luka Mnu.Houngbo kuzancedisa ele Zimbabwe.
Kodwa osebenzela inkampani ye Delta uMnu Sizabantu Dube uthi imihlangano efana lalowu kayisizi lutho nxa abaqhatshi bengalungisanga indaba zeholo.
Ingcwethi zithi uhambo luka Mnu. Houngbo luqakatheke kakhulu kwele Zimbabwe ngoba yilo elizathatha isikhundla sika Mongameli we ILO conference ngomnyaka ozayo.
NgoLwesibili, uMnu. Houngbo yena odabuka kwele Togo njalo engomkhulu we ILO wakuqala ophuma kwele Africa uzahlangana lo mongameli Emmerson Mnangagwa emzini wakhe e state house.
Izisebenzi kwele Zimbabwe ziyakhala ngenxa yeholo ezithi liphansi kakhulu kubangelwa yikugugudeka kwemali ye Zimbabwe Gold (ZiG) yona eyawa isisindo ngesilinganiso samatshumi amane lantathu ekhulwini-43% selokhe yabekwa okusemthethweni nguhulumende ngo Mbimbitho lonyaka.
Inengi lezisebenzi lithi alenelisi ukuthenga ukudla, ukubhadala indleko zesikolo lokugcina imali eyokwakha lokuya kukhefu ngenxa yesimo somnotho.
Forum