Kukhetho lukamongameli, abasekeli babancintisa kukhetho oluzayo uJD Vance loTim Waltz bakhangelelwe ukuba bazangqikilana kungxoxompikiswano yabo yokuqala lokucina ngoLwesibili kusihlwa.
UTim Walz loJD Vance bazangikilana kungxoxompikiswano le okuzabe kungelabantu ababukeleyo njalo ezakhokhelwa ngabantu ababili okwehola lengxenye.
UVance onguSenator weOhio ungumsekeli kaMnu. Donald Trump. Uthi ingxoxompikiswano le izaveza ukuba ibandla leRepublican Party lizavikela njani imingcele njalo ngendlela elizathuthukisa ngayo umnotho weMelika.
“Leli luthuba lokuthi sitshele abantu eMelika ukuba sizakwenza njani ukuthi impilo yabo ibengcono, bathuthuke njalo lokuthi uTrump uzavimba abokuza ezansi yelizwe. Singenza lokhu sizanqoba.”
UWalz ongusibalokhulu wesabelo seMinnesota ungumsekeli kaNkosikazi Kamala Harris. Uthi ibandla leDemocratic Party lifisa ukunceda kakhulu izisebenzi zeMelika hatshi laba abaphikisana labo abalomunye umbono.
“Njengomuntu wonke ngakhulela enzikini yendawo le hatshi uJD owafunda eYale esekelwa yizinothi zeSilicon Valley wathi esephutshe izifundo zakhe waloba ugwalo ezithethisa. Yeyi, ayisiyo indlela yokuphila labantu leyo eMelika. Ngifisa ukulitshela ukuthi ngimelele ukuyakungxoxompikiswano le ngiyebhekana lendoda le.”
UVance owayezonda uTrump wanqoba kukhetho lweSenate esekelwa nguye. Khathesi uselandela uTrump olesihloko sokhetho esithi ‘America First’.
“Hanti liyabona khonamanje ama-Democrats athi sizenza ominamina abakwenza engani yinhlamba. Nxa ukuba nguminamina kusitsho ukuthi ngisekela izisebenzi kulezinothi akubenjalo, ngisekeleni.”
UVance usanda kutshela inkokheli yamazwe akuzwekazi leEurope ukuba kumele benike imali eleUkrain ukuze lilwisane lele Russia elihlasela ngamandla. UWalz uthi uVance loTrump bafuna ukudiliza ubukhokheli beMelika.
“Abakubandla lamaRepublicans babejayele ukukhuluma ngenkululeko besitsho khonokho ngempela. Babengeke bebalekele abasekelana labo. Babengeke bayekele eleUkraine lisilwa lodwa.”
UVance uthi uNkosikazi Harris uthwalise nzima izisebenzi hatshi abantu bokuza.
UWalz uthi uTrump ngusomabhizimusi ongene kwezombusazwe ukwenzela ukunothisa abanye abanothileyo.
“Ufuna inzuzo yomnotho ibesezandleni zabanothileyo abantu abanengi besidla ingqweqwe zomlomo. Bafuna ukuthi kulahlwe umthetho wezempilakahle oweAffordable Care Act kukhulunywe ngokugula kwabantu. Baphungula iSocial Security leMedicare okwenza umama aphile, engabimpofu.”
Leyingxoxompikiswano yokucina kungakenziwa ukhetho mhlaba 5 kuLwezi. Okwamanje abanye abantu ezabelweni ezitshiyeneyo sebeqalisile ukuvota.
Forum