Abathakazelela umkhosi wokunanza ilanga lokukhothama kwenkosi yesizwe samaNdebele uMzilikazi bathi abantu babebuye ngobunengi babo kumcimbi walonyaka ngeviki edluleyo kodwa kudingakala usizo ngoba abanye abasafinyelelanga eMhlahlandlela sokusilele amabhasi.
Ukuze sizwe okunengi ngaloludaba, langeminye imgubho yesintu, sixoxa loMnu. Bongani Mazwi Mkhwananzi, ovame ukuphatheka kulimbuthano, njalo elilunga lebutho.
Kusenjalo, kweziphathelane labesifazana, sixoxe loNkosikazi Patricia Tshabalala, oxwayisa iqembu lamatshitshi aziwa ngokuthi: Intombi Zomhlahlandlela, njalo ophakathi kohlelo lokukhuthaza abafana abasakhulayo ukuthi babeyingxenye yamabutho.
UNkosikazi Tshabalala uchasisa kabanzi ngokuthi kungani amatshitshi amanengi ayengagqokanga izembatho ezivala amabele lonyaka lokuthi kuyini kahle-kahle abakufundiswayo.
Umcimbi lo obikwa ubuqoqwe yinhlanganiso ye Mthwakazi KaMzilikazi Cultural Association le Iqoqo Lamantungwa KaMzilikazi LeZinduna, usuqhutshwa minyaka-yonke ngeMgqibelo elandela umhlaka 5 kuMpandula, ilanga lokukhothama kwenkosi uMzilikazi ngomnyaka ka 1868.
Lonyaka, abantu bafola besuka eMatshobana koBulawayo besiya eCity Hall, lapho abemukela umbiko kasodolobho uMnu. David Coltart, basebegada amabhasi abasa eMhlahlandlela, okungamakhilomitha angamatshumi amabili emgwaqweni weGwanda Road.
Inengi labantu lalivunule okwesintu, njalo kulemihlobo eyehlukeneyo eyakoMthwakazi, egoqela amaXhosa, amaKhalanga, amaTonga, amaSuthu, lamaVenda.
Kwakuthe gwaqa induna, inkosi, abakhokheli bezomdabu abavela eSouth Africa leSwatini, lamatshitshi ayevela eningizimu yeAfrica.
Indikimba yomcimbi walonyaka, ibingeyokulwisana lokusetshenziswa kwezidakamizwa, okubikwa sokubhahile elizweni, ikakhulu kwabasakhulayo.
Forum