Amazwe omhlaba ngeSonto ananze usuku lokukhuthaza umbuso wentando kazulu olwe-International day of Democracy.
Unobhala jikelele womanyano wamazwe omhlaba oweUnited Nations uMnu Antonio Guterres uthi lonyaka usuku lolu luqakathekile kakhulu njengoba kulamazwe angamatshumi amahlanu aqhuba ukhetho.
Kumbiko wakhe uMnu Guterres uthe usuku lolu lupha uzulu ithuba lokugcizelela ukuqakatheka kwamalungelo oluntu, ukulandelwa kwemithetho kanye lokusebenza kuhle kwenkantolo.
Usuku lolu lunanzwa ngesikhathi kulabalwela amalungelo oluntu labamabandla ezombusazwe abalokhu bevalelwe ngemva kokubotshwa besetheswa amacala agoqela ukubuthana bengelamvumo kanye lokuqoqa ukutshengisela ngesikhathi kulungiselelwa umhlangano omkhulu oweSADC Summit owaqhutshelwa eHarare ngenyanga edluleyo.
Umanyano we-United Nations lezinye inhlanganiso ezilwela amalungelo oluntu sezikhuthaze eleZimbabwe ukuthi likhulule ababotshiweyo laba njalo lihloniphe amalungelo oluntu.
Olwela amalungelo abathengi esebenza lenhlanganiso yeNational Consumer Rights Association uMnu Effie Dlela Ncube utshele iStudio7 ukuthi kusakunengi okufanele kwenziwe eZimbabwe ukuze kuvikelwe amalungelo kazulu.
Abebandla elibusayo eleZanu-PF bathi ababotshiweyo balamacala abawadalayo njalo inkantolo zisebenza zizimele ngakho zilandela imithetho yelizwe.
Umnu Kudakwashe Munsaka okhokhela inhlanganiso esebenza lebandla leZanu-PF eyeForever Associates Zimbabwe, FAZ uthi umbuso wentando kazulu ukhona eZimbabwe.
Forum