Abalimi bathi ukuhlaselwa kweleUkraine ngeleRussia sokubadalele ubunzima ngoba intengo yezinto ezisetshenziswa ekulimeni isiqonge kakhulu.
Umthelela wempi le kumnotho weZimbabwe uvele sobala ngo2022 kugwalo olwethulwe zingatsha zomanyano weUnited Nations ezibalisa olweWorld Food Program (WFP), i-Food and Agriculture Organization kanye leInternational Organization for Migration.
Kugwalo lolu, olulesihloko esithi ‘Impact of the Ukraine Crisis in Zimbabwe,’ inhlanganiso lezi zaveza ukuthi ukuqhamuka kwempi le kwabangela ukukhwela kwentengo yezinto ezifana lemvundiso ye-fertilizer, amafutha ezimota lokudla eZimbabwe lasemhlabeni jikelele ngoba amazwe amanengi ethenga izinto lezi kweleRussia laseUkraine.
Ugwalo lolu luthi intengo ye-fertilizer efana leAN yakhwela isuka kumadola aseMelika angamatshumi amahlanu lanhlanu, US$55 yaya kumadola aphezu kwamatshumi ayisithupha, US$65, isaka le50kg. Isaka lomkhakha weCompound D lona lakhuphuka lisuka kumadola citshe angamatshumi amane, US$38, laya kumatshumi amane lanhlanu, US$45.
Okwamanje, indawo, futhi kusiya ngohlonzi lwayo, enye imvundiso ibiza amadola angamatshumi ayisikhombisa, US$70, kusiya kwayisitshiyagalolunye, US$90, ngokutsho kukaMnu Clive Munakandafa, umsekeli kamgcinisihlalo wenhlanganiso yabalimi eyeZimbabwe Commercial Farmers Union eMatabeleland North.
UMunakandafa uthi lanxa kunjalo, uhulumende wangenela waphathisa abalimi abanengi ngemvundiso lezinye imfanelo zokulima lanxa nje izulu lasuka langani.
Umlimi uMnu Wiston Babbage laye utshele umsakazo weStudio 7 ukuthi ngenxa yokudula kwe-fertilizer, usesebenzisa ubulongwe ezilimeli zakhe.
Ngomnyaka, i-Zimbabwe ithenga imvundiso ye-fertilizer eyisilinganiso samatshumi ayisikhombisa ekhulwini, 70 percent, emazweni agoqela iRussia, Ukraine, Mozambique, United Arab Emirates, Mauritias leSouth Africa.
Ugatsha lomanyano weUnited Nations olukhangelane lokuqoqa amanani okuthengiselana phakathi kwamazwe omhlaba olweUN Comtrade luthi nyakenye eleZimbabwe lathenga i-fertilizer ebiza izigidi phose ezingamatshumi amabili, US$19.62 million eUkraine njalo lathenga ebiza US$25.92 million eRussia.
NgoMbimbitho iRussia iphe iZimbabwe i-fertilizer yamahala engamathani azinkulungwane ezingamatshumi aphezu kancane kwamabili, 23,000 metric tonnes kanye lomumbu oyisilinganiso senkulungwane zama-tonne ezingamatshumi amabili lanhlanu, 25,000 tonnes.
Kodwa ingcwethi ecubungula ezenotho uMnu Gift Mugano uthi isipho seRussia lesi asiphathisanga ilizwe ngoba imvundiso le incane kakhulu.
UMugano ugcizelele wathi iZimbabwe ngeke ithembele kweleRussia kuphela kundaba zokuthuthukisa umnotho wayo.
Intengo yamafutha ezimota layo yakhwela eZimbabwe lasemhlabeni jikelele ngenxa yempi yeRussia leUkraine ngoba eleRussia ngelinye lamazwe ahamba phambili ekuthengiseni lawamafutha.
Enye njalo ingcwethi kwezenotho uMnu Victor Bhoroma uthi okudanisayo yikuthi lanxa izinto ezisetshenziswa ekulimeni ezinengi zikhwelile ngenxa yempi le, intengo yezilimo ilokhe iphansi kakhulu eZimbabwe, osokudale ukuthi abalimi abanengi balime igwayi, lona elilenzuzo ephezulu nxa kuqathaniswa lomumbu lengqoloyi.
Nyakenye iZimbabwe ithenge impahla egoqela imvundiso, indizamtshina lengqoloyi kweleRussia ebiza izigidi ezingamakhulu phose amabili, US$172.35 million.
Ngo2022 yathenga impahla ebiza izigidi ezedlula kancane amatshumi amabili, US$23.4 million kodwa yona yathengisela iRussia impahla ebiza isigidi esilengxenye kuphela, $1.52 million, okuyinto esolwa zingcwethi kwezenotho zisithi ukuthengiselana phakathi kwamazwe womabili kumele kulingane ukuze iZimbabwe layo ithole inzuzo ezwayo.
Forum