Selokhe ele Zimbabwe letheswa izijeziso zomnotho ngamazwe aphetsheya, selikhangele emazweni afana lele Russia ukuvuselela ezokulima lokutshalwa kwemali elizweni. Kodwa ingcwethi kwezokulima zithi lokhu kulakho ukungaphumeleli ngenxa yokuba indlela zokulima zase Russia azihambelani lezeZimbabwe.
Lokhu kuza ngemva kokuba ele Zimbabwe selithole umvundiso we fertilizer kwele Russia, ofika amathani azinkulungwane ezingangamatshumi amabili lantathu- 23 000 metric tonnes ukuncediseka kwezokulima
Ekuqaleni kwawonalo umnyaka, umsekeli ka mongameli we lizwe uMnu. Constantino Chiwenga wethekelela eleRussia lapho athakazelela khona indlela zokulima zalelolizwe. Wathembisa ukuba ele Zimbabwe lizafunda kulokho okwenziwa yi Russia ekulimeni.
Imbiko etholwe yi Studio 7 kayizange iveze imali eleZimbabwe eseliyinikwe yi Russia kwezolima. Kodwa uhambo luka Mnu. Chiwenga ndawonye lemvundiso eyaphiwa ilizwe ngeleRussia ngobunye bobufakazi obuveza umsebenzi owenziwa yilelolizwe ukuncedisa kwezokulima selokhe iZimbabwe yetheswa izijeziso zomnotho.
Ingcwethi kwezokulima zithi kunzima ukuba ele Zimbabwe lithole okubambekayo kwezokulima kwele Russia ngoba amazwe lawa elomkhathi ohlukileyo. Phezu kwalokho ingcwethi lezi zithi ele Russia lifuna ukuzitholela okwembiwa kwele Zimbabwe.
Eyinye yalezi ngcitshi efundisa ekolitshini le Bindura University ngu Mnu. Liberty Shoriwa yena othi ele Zimbabwe kalingeke lithole okunengi kwele Russia kwezokulima.
‘’Akula okunengi ele Zimbabwe elingakuthola kusuka eRussia ngoba iRussia ifuna ukuthola igolide lokunye okwenjiwa kuleli ayilandaba lezokulima kwethu kungakho kungela okunengi ekwenzayo’’
Lokhu kusekelwe ngeyinye ingcitshi kwezokulima esebenza izimele uMnu McCarthy Tshuma.
‘’ IRussia ekufunayo kuleli yikuba ithola ama mines lokuba ivikele ele ZImbabwe kwezomvikela lokunye hatshi okunye lokhu. Kunzima ukuba iZimbabwe ithole okunengi kuyo’’
Kodwa enye ingcitshi esebenza le Zimbabwe Agrarian Society uMnu Lazarus Ngwenya uthi ele Zimbabwe lilakho ukufunda ukulima kusetshenziswa imitshina yakulezinsuku okwenziwa e Russia.
’ IZimbabwe ingathola ulwazi lwemitshina yakulezinsuku kusuka e Russia ngoba ungakhangela bona vele sebephambili kwethu kundaba zokulima’’
Umlimisi esigabeni se Zhombe uMnu Mlungisi Mabhena uthi ele Zimbabwe liyamukela indlela zokufundela ukulima kungelani lokuba zivela kuliphi ilizwe.
‘’ IZimbabwe iyamukela indlela ezintsha zokulima kungelani lokuthi kuvela kuliphi ilizwe. Kungakho ke sifuna ukufunda labantwana nxa besiya funda iagriculture kwele Russia kuyavuselela umnotho wethu’’
Imizamo yokuthola imbono kusigodlo se Russia yehlule iStudio 7 itshelwa ukuba ilobe imibuzo ezaphendulwa ngemva kwamalanga ambalwa.
Forum