Amabandla ezombusazwe amabili amakhulu eMelika aveza ukukhathazeka ngobuqotho bokhetho (election integrity) ngesikhathi kukhangelelwe ukhetho lokudinga umongameli ngoLwezi.
Abebandla leDemocratic Party bethesa abebandla leRepublican Party umlandu wokunciphisa amathuba okuhlola indawo zokuvotela kanye lokuqoqa ukumisa ukuhlolisiswa kwempumela yokhetho. Abebandla leRepublican Party bona bacabangela ukuthi abeDemocratic Party bazasebenzisa amabhalothi alabo abangasoze bavote, lokusebenzisa imitshina ukuqilibezela.
Ongena kulolukhetho emele ibandla leRepublican Party, owake waba ngumongameli uMnu Donald Trump, ulamacala asemthethwandaba awokuzama ukuguqula impumela yokhetho luka2020 kulandela ukunqotshwa kwakhe.
“Ngangicabanga ukuthi kwabalokuqilibezela, ukhetho olwatshontshwayo,” kutsho uTrump
Ozamela ibandla leDemocratic Party kulolukhetho umsekeli kamongameli uNkosikazi Kamala Harris wethesa uTrump umlandu wokuzama ukuletha ukungethembeki kokhetho, njalo esethembisa ukulandela imithetho yeleMelika.
“Kusukisela ekulandeleni imithetho. Kusiya kukhetho olukhululekileyo. Kusiya ekupheni amandla onqobileyo kulokuthula.”
Ingatsha zikahulumende bezikhulumisana ngodaba olwenzakala mhlaka 6 Zibandlela 2021, lapho abasekeli bakaTrump abahlasela khona isigodlo se-US Capitol ngoba bengathabanga ngokunqotshwa komkhokheli wabo.
Imihlangano le iphathisile na ekuletheni ukwethembeka kokhetho?
Abakunhlanganiso ezifana leyeLeague of Women Voters, ekhokhelwa nguNkosikazi Celina Stewart balethemba lokuthi izaphathisa.
“Sizamelela sibone. Kuzamele sibone ukuthi yikuyini okuzakwenzakala, ukuthi kuzaphumani kukhetho, abantu bazakuzwa njani ngakho, bazatshengisela na njalo ukutshengisela lokhu kuzakuba lodlakela na, ngelesifiso sokuthi kungabi lodlakela.”
Okwakhathesi kuveza ukuthi izinto zihamba kuhle, kutsho umgcinisihlalo weFederal Election Assistance Commission, uMnu Ben Hovland.
“Sesibe lokhetho lwamaprimary, abaphatha ukhetho sebethole ithuba lokulungiselela njalo ngibona sengathi sesilungiselele ukhetho lukaLwezi ngokugcweleyo.”
Owayekhokhela ukubalwa kwamavoti esigabeni se-Illinois, uAaron Ammons uthi abebandla leRepublican Party ngomnyaka ka2020 bazama ukumisa ukubalwa kwamavoti athunyelwe ngeposo,
“Umahlulelo wakwala lokho ngawabala amavoti, kodwa bazama njengalokho abakuzamayo kwezinye indawo elizweni.”
Ukwethuselwa kwabantu, kanye lokubophiswa kwabantu sekubangele ukuthi abakhokhela ukhetho labasebenza kungelambadalo bengafuni ukuphatheka ekuphathweni kokhetho kutsho uAmmons.
Kuqakathekile ukuthi kunxuswe abangena kukhetho, abakhokheli bamabandla ezombusazwe kanye lozulu ukuthi bahlole ukuqhutshwa kokhetho, kutsho umqondisi wezokhetho eSt. Louis County, eMissouri, uMnu Eric Fey.
“Wonke umuntu uyenelisa ukubona kuvulwa amavoti athunyelwe ngeposo, kubalwa amavoti lokunye.”
Ubakhokheli bebandla leRepublican Party eSenate bazama ukubeka umthetho othi bonke ababhalisa ukuvota kumele babelencwadi eziveza ukuthi bayizizalwane zeleMelika. Abakubandla leDemocratic Party abanengi bathi umthetho uthi umuntu angayisiso sizalwane seleMelika akavunyelwa ukuvota njalo akulabufakazi bokuthi abangela maphepha okuhlala eMelika bayavota kukhetho.
Forum