Umsekeli kamongameli weMelika, uNkosikazi Kamala Harris, ngoLwesine wamukele ukukhethwa kwakhe ukuthi amele ibandla leDemocratic Party kukhetho lokudinga umongameli ngoLwezi.
Wamukele ukukhethwa lokhu sekwedlule inyanga uMongameli Joe Biden waphuma kukhetho lolu kulandela ukukhonona kwamalunga ebandla leli ayesithi useluphele.
UNkosikazi Harris uthe uzamela abantu bonke eMelika ikakhulu izisebenzi engakhethwa nguzulu ngoLwezi.
“Ngimele umuntu wonke, ngiyamukela ukukhethwa kwami ukuthi ngibe ngumongameli weMelika. Sifuna ukuyaphambili silabasebenzi abahlezi kahle ngoba siyakwazi ukuthi lokhu kuzasipha intuthuko.”
Uphinde wakhuluma ngohlelo okuthiwa luqhutshwa ngamalunga ebandla leRepublican Party olubizwa ngokuthi yiProject 2025 athi lulakho ukuphazamisa indlela uhulumende asebenza ngayo, ukuvimba ilungelo labesifazana abafisa ukukhupha izisu lokunye okuqakathekiswa nguzulu.
“Siyawazi umonakalo ozakuba khona nxa uTrump engabuyela esikhundleni. Konke lokhu sikubona kuhlelo lwakhe labanye bakhe olweProject 2025 olwalotshwa ngabacebisi bakhe olulakho ukubisela eleMelika emuva. Kodwa thina sithi kasibuyeli emuva.”
Kusenjalo, uTrump, obakhankasela ukhetho oluzayo esesabelweni seArizona, uthe uNkosikazi Harris kasoze enelise ukuvimba imingcele yelizwe osekugcwele abantu bokuza.
“Nguye owayephethe imingcele. Kodwa kathesi usesithi kazange akwenze lokhu. Akulamngcele ovuza njengalo emhlabeni wonke jikelele.”
Amalunga ebandla lika Nkosikazi Harris abesemhlanganweni weDemocratic National Convention eChicago, athakazelele okwethulwe ngumkhokheli wabo omutsha. Omunye wabo nguNkosikazi Darrell Bekeman, ohlala esabelweni seArizona.
“Uyasilungisela impilo yethu. Yikho kanye lokhu esikufisayo. Thina siyaphambili okulobuhle kuphela hatshi emuva.”
Kusenjalo, amapholisa esabelweni seArizona asebophe uMnu. Ronald Syvrud ophume enkundleni zokuxhumana ku-inthanethi esithi ufuna ukudubula uTrump, owadutshulwa kunyanga edluleyo ekhuluma lozulu ePennsylvania.
Forum