Intsha yebandla lamaSabatha eJohannesburg elilabanengi abadabuka eZimbabwe izolo ibifolile emigwaqweni yelokitshi leYeoville elihlala abokuza abanengi, ikhuthaza ukuphela komkhuba wokusetshenziswa kwezidakamizwa lokudalwa kwamacala.
Abatsha laba abebekhokhelwa ngamapholisa bebengena umgwaqo ngomgwaqo bekhuthaza izakhamizi, bezipha amaphetshana axwayisa ngobubi lengozi yezidakamizwa. IYeviolle ngelinye lamalokitshi ahlala abeZimbabwe abanengi.
Omunye wabasakhulayo uThabile Mpofu uthe kuyabakhathaza ukubona impilo zentsha zitshabalala ngenxa yezidakamizwa.
“Ikhona impilo ngaphandle kwezidakamizwa. Akufanelanga impilo yomuntu idepende kuzidakamizwa because izidakamizwa azimakhi umuntu ziyadistroyer.”
Lumkhankaso uza ngesikhathi lapho uhulumende weSouth Africa esesungule inhlelo zokuzingela abokuza abaselizweni ngokungekho emthethweni. Inyathelo likahulumende leli lifuqwa yikukhonona kwezizalwane zakweleSouth Africa ezethesa abokuza umlandu wokubamba inkunzi, ubusela, ukutshontsha lokudala amanye amacala ehlukeneyo.
Okhokhela abatsha laba uNkosikazi Nompiliso Dube Shabangu uthi lobanje kungasiqiniso ukuthi bonke abokuza bayizigangi njalo yibo bodwa abadala amacala, njengebandla bakhuthaza ukuziphatha, ukuhlonitshwa kwempilo, impahla zabanikazi lendawo lapho umuntu ayabe ethekelele khona.
“Abantu bokuza ma befika emzini kwangathi bangaziphatha kahle. Singahlukumezi abantu esibathole endaweni. Sifike silandele umthetho njengioba unjalo. Singafiki siphethe izidakamizwaezibulala impilo zabantwana bakusasa ngoba sibulala ikusasa.”
Izakhamizi zelokitshi leYeviolle, eBerea leHilbrow sekulesikhathi zikhala ngokuthi nxa zihamba emigwaqweni zibanjwa inkunzi, zithathelwa omakhalekhukhwini lezinye impahla zazo. Zinengi izehlakalo zabadojwa befile labadutshulwa libalele kusenziwa ngabakhuthuzi abayabe sebekuswele abakudingayo loba sebecunulwe yikuthi lo othathelwayo akafuni lempahla zakhe.
Osakhulayo uRyan Mlalazi laye obekulo umkhankaso uthi inengi lalokhu kuganga kudalwa yikusetshenziswa kwezidakamizwa.
“It causes them ukuthi ipschological brain yabo ingasebenzi kahle especially inyaope since idestroyer amafamilies.”
Uhulumende weGauteng uyavumelana labebandla lamaSabatha ukuthi ukusetshenziswa kwezidakamiswa, ubukliwi, ukubamba iganyavu, ubusela ukubulala lobunye ubugangi kubhahile kulesi sabelo. Enkulumeni asanda kuyethulela izakhamizi zesabelo, usibalukhulu uMnumzana Panyaza Lesufi ufunge wagomela ethi izigangi zizayifunda ivaliwe lonyaka.
“Ubugebenga busithwalise nzima eGauteng. Sekungani sisejele ezindlini zethu ngoba phandle izigebenga zisithwalele ubhulo.”
Lobanje izizalwane zakweleSouth Africa zikhala ngokuthi abokuza yibo abadala amacala kakhulu eSouth Africa, ucwaningo oluqhutshwe yinhlanganiso ye Institute of Security Studies ngo 2022 iveze ukuthi inengi labokuza abasemajele likusilinganiso sokuthathu kuphela ekhulwini, kusitsho ukuthi inengi labatholakala belamacala yizizalwane zakweleSouth Africa.
Forum