Owayemela iBinga North ephalamende uMnu. Prince Dubeko Sibanda obikwa ebotshwe ngoMgqibelo emngceleni weSouth Africa leZimbabwe eBeitbridge Border Post engena elizweni ubikwa elokhe esezandleni zamapholisa njalo akukacaci ukuthi wetheswa liphi icala.
Ilunga lebandla leCCC umNu. Pashor Raphael Sibanda utshele iStudio 7 ukuthi uMnu. Sibanda uthwalelwe enkambeni yamapholisa eHarare ngeSonto njalo basadinga amagqwetha azamphathisa.
Asenelisanga ukukhuluma lamapholisa ngaloludaba. Amanye amabandla aphikisayo labalwela ilungelo loluntu bayakhonona ngabathi yikubotshwa mahlayana lokuhlukunyezwa kusukela kusalungiselelwa imihlangano yeSADC ngoba kucatshangelwa ukuthi bafuna ukutshengisela. Abanye balokhe bevalelwe entolongweni njalo bengakhululwa ngemali yesibambiso eye bail.
Umongameli Emmerson Mnangagwa wathi akufanelanga kube lomuntu ozaphazamisa ukuthula kuqhutshwa imihlangano yeSADC, okwagcizelelwa ngumphathintambo obona ngokwenzakala elizweni, uMnu. Kazembe Kazembe, losikomitshi wamapholisa uMnu. Godwin Matanga owathi kulungile ukuthi kube lamapholisa lamasotsha amanengi ezitaladini ngalesi isikhathi.
Abanengi bathi lokhu yikwethusela abantu lokunyathezela ilungelo labo.
Forum