Uhlangothi lomanyano wamazwe omhlaba olukhangelane lamalungelo kazulu olwe-United Nations Human Rights luthi eleZimbabwe kumele likhulule abaphikisayo labalwela amalungelo oluntu ababotshwe ngesikhathi ilizwe lilungiselela umhlangano weSADC Summit, ozaqhutshwa ngoMgqibelo besetheswa umlandu wokwephula umthetho weCriminal Law (Codification) and Reform Act.
Kumbiko walo owethulwe ngoLwesithathu, uhlangothi lolu luthe lukhathazekile ngokubotshwa, ukuhlukuluzwa lokwethuselwa kwabalwela amalungelo oluntu labaphikisayo.
Ezinye inhlanganiso ezigoqela eye-Amnesty International lazo sezikhuphe imibiko zisola kakhulu okwenzakala eZimbabwe.
Lokhu kwenzakala ngesikhathi inhlanganiso yamagqwetha eyeZimbabwe Lawyers for Human Rights isithi isiphanyeke enkantolo yeHigh Court isicelo sokuthi abe-Zimbabwe Prisons and Correctional Services bavumele unobhala jikelele wenhlanganiso yababalisi eye-Amalgamated Rural Teachers Union of Zimbabwe uMnu. Robson Chere, ayehlolwa ngodokotela.
Watshaywa kabuhlungu ngabacatshangelwa ukuba ngamapholisa ensitha kulandela ukubotshwa kwakhe eHarare.
EMasvingo, amagqwetha la athi asekhweze njalo edale leHigh Court isicelo sokuthi isethekeli esivela eCzech Republic, uMnu. Lukas Slavik, akhululwe ngesibambiso sebail.
USlavik wetheswa umlandu wokukwethula imibiko okuthiwa yayingamanga.
Olwela amalungelo ezisebenzi ekunhlanganiso yeZimbabwe Congress of Trade Unions, uMnu. Ambrose Sibindi uthi umbiko weUnited Nations uqondile njalo uhulumende kumele awulalele.
UMnu Kudakwashe Munsaka umkhokheli wenhlanganiso edlelana lebandla leZanu-PF eye Forever Associates Zimbabwe uthi abephula umthetho kumele babotshwe.
Forum