Igcikwane leHuman Papiloma Virus ligcikwane elitholakala ebantwini abalemvukuzane yomlomo wesibeletho kanye lezinye imvukuzane ezihlasela izitho zensitha ezabesifazana kanye labesilisa. Ingcwethi kwezempilakahle zikhuluma ngokuqakatheka komuthi wokuvikela leligcikwane.
Abalemvukuzane yomlomo wesibeletho bande ukutholakala belegcikwane leHuman Papilloma Virus okwabangela ukuthi kudingwe imithi yokwenqabela leligcikwane. Abezempilakahle bathi liyengezelela amathuba okuhlaselwa ligcikwane elibangela umkhuhlane weHIV kulabo abalamasotsha omzimba angaselamandla. Udokotela Derick Matsika wakoBulawayo uchasisa ngegcikwane le Human Papilloma Virus.
“I Human papilloma virus ligcikwane elithelelwana emacansini, into embi ngalo yikuthi akula ndlela yikuthi ube kwazi ukuthi ulalo igcikwane leli. Abantu abanengi baphila lalo bengakwazi ukuthi balalo leligcikwane. Igcikwane leli ungalithola, kubomama liyande ukwenza imvukuzane yesibeletho. Emadodeni yona yande ukwenza lokhu esikuthi yi cancer of the penis, kodwa lowu ngumkhuhlane omlutshwane awuvamanga kakhulu. Umkhuhlane lo ungaba lawo awula treatment, nxa umzimba wakho ufit uyaphela wodwa kodwa nxa ulomzimba oweak kumbe ole HIV yibo abacina besiba lecancer.”
Udokotela Matsika uchasisa kabanzi ngemithi yokuvikela umkhuhlane we Human Papilloma Virus.
"Endleleni yokungani siya controller umkhuhlane lo, yikho okwaba khona levaccine. I vaccine leyi iphiwa emuntwini ongazake ahlangane lomuntu ongubaba lomuntu ongazake ahlangane leHPV virus. Yikho sithola ukuthi I vaccine leyi ibisiba khona ezikolo kuhlatshwa abantwana abaleminyaka elitshumi lambili kusehla kusiya phansi. Lokhu kwenzelwa ukuthi i immune system yabo ibe strong, ukuthi lapho abayakhula khona bengahlanga lomkhuhlane lo bayabe besenelisa ukulwisana lawo. Uhlupho ngumuntu osuke wahlangana lobaba engxenye uyabe eseke wahlangana lawo, so i vaccine leyi iyabe ingasasebenzi. Yikho sikhuthaza ukuthi nxa bonke abantwana abancane abangamankazana bengathola i vaccine leyi, kusiya phambili siba lamanani amalutshwane awemvukuzane.”
Lokhu kugcizelelwe ngumongi, uNkosikazi Sithandazile Gumede yena othi kuqakathekile ukuba abantwana abasakhulayo bathole imithi yokulwisana leHuman Papilloma Virus ukuze kwehliswe ukumemetheka kwemvukuzane.
“I vaccine leyi inikwa abantu ukuze bengabi lama cancer esibeletho, owomlomo lamanye nye ama cancer. I vaccine iyande ukuphiwa abantwana abangamankazana labafana kusukule kuminyaka eyisitshiyagalolinye. Kuvikeleka ngcono nxa umtwana eyiphiwe between 9 to 12 years, bengakangeni emacansini.”
UNkosikazi Caren Mlawuzi umhlali wakoBulawayo uthi kubalulekile ukuba abantu befundiswe ngempilakahle yabo ukuze bengasaleli emuva nxa kusiba lemikhankaso yemithi ephiwayo ukuze kuvikelwe imikhuhlane etshiyeneyo.
“Kuqakathekile ukuthi sihlale sifundiswa nje ngempilakahle. Mina nginje bengingakwazi ukuthi iHPV vaccine leyi ephiwa abantwana esikolo ngeyokwehlisa amathuba okuba le Cancer yesibeletho. Ngibona nxa singafundiswa kuzasenza sikhuthaze abantwana ukuba nxa kufika inhlelo ze vaccination labo babe yingxenye ngoba kuphathisa impilakahle yabo.”
Kunani elingaba zinkulungwane ezintathu (3000) labantu abatholakala belegcikwane leli nyakenye, kulesilinganiso esingamatshumi ayisikhombisa ekhulwini (70%) abathi bengabanjwa belemvukuzane le belahlekelwe yimpilo. Lokhu kwachazwa ngumphathintambo wogatsha lwezempilakahle kanye lokondliwa kabantwana umnumzana Douglas Mombeshora ngenyanga kaMabasa lonyaka ngesikhathi ebhoda lequla le World Health Organisation elalivakatshele elizweni.
Abezempilakahle bathi kulamanyathelo okuphungula umkhuhlane lo emphakathini ngokukhuthaza amantombazana asakhulayo ukuthi ahlatshwe imithi eyenza ukuba nxa lapho esekhululi, enelisa ukulwisana laleligcikwane. Abantwana abangabafana abandanga ukuphiwa imithi leyi evikelayo ngoba imvukuzane edwalwa yi human papilloma virus ehlasela abesilisa ingavamanga.
Ngokunjalo, abesifazana lamantombazane asekhulakhulule bakhuthazwa ukuhlala besiyahlolwa kanye ngomnyaka umlomo wesibeletho ukuze babonakale kusaselesikhathi nxa bengabe belemvukuzane yomlomo wesibeletho. Lokhu kungenziwa kungaphephiswa isizwe emvukuzaneni edalwa yi human papilloma virus.
Forum