Inyathelo elithethwe ngumongameli Joe Biden elokuthi engancintisi kukhetho lokudinga umongameli weMelika selibe lomthelela omkhulu kulumkhankaso. Intathelizindaba yeVOA uScott Stearns usethulela loludaba, olutolikwe yi Studio7.
Omunye owamangaliswa linyathelo likamongameli Biden nguMnu. Jon Diggs, olelungelo lokuvota eGorgia.
“Ngibona engathi abantu abanjengami eMelika abangakacabangisisi ukuthi bavotele liphi ibandla, kumbe abafuna ukuvotela amaDemocrats, sisamangele njalo asikwazi ukuthi lokhu kutshoni kithi”
UMnu. Jonny Bester, ohlala eAtlanta,ozavota eGeorgia uthi ngabe umongameli Biden watshiya kudala lumkhankaso.
“Ngangingelaqiniso ngokuthi ilizwe lethu liya ngaphi ngoba u Biden ngangingafuni ukumbona eqhubeka njalo ebusa. Kodwa nxa sicabanga ngomkhankaso wakhe besesikhangela uTrump ngubani esesilaye khathesi?”
Esigabeni seOhio, umsekeli wama Democrats uMnu. Richard Freeman uthi umongameli Biden wayezanqotshwa nguMnu. Donald Trump.
“Ngibona engani yisinqumo esihle lesi. Ngibona engani uBiden ubengelathuba lokunqoba uTrump. Abantu abanengi bebesola ukuthi useluphele, lami ngingomunye wabo.”
UNkosikazi Cathy Lindmier weNebraska uthi umongameli Biden ubengaselangqondo ezibukhali selokhe wathatha intambo zombuso.
“Ngidanile ngoba ngiyananzelela ukuthi uBiden wenze umsebenzi omuhle, njalo wenze lokhu ngoba efuna ukuthi ilizwe libambane. Kodwa akusenzakalanga.”
Esigabeni seSouth Carolina, uNkosikazi Mariana Hall uthi okwenziwe ngumongameli Biden akusoze kuguqule ingqondo yakhe ngokusekela uMnu. Trump.
“Ngibona engani kuzakuba mnandi ukubukela ibandla lamaDemocrats ligijima lidinga umuntu ozathatha isikhundla sikaBiden kulumncintiswano. Bengibona ukuthi bebengathandi ukuthi kube nguKamala Harris ngenxa yamazwi amabi awakhuluma ngokhokhelayo okwamanje.”
Ovota esigabeni seWashington uNkosazana Jill Homme uthi ubona umsekeli kamongameli uNkosikazi Kamala Harris efanele ukuncintisa kulesi isikhundla.
“Ngisekela uKamala. Ngiyathanda ukubona owesifazana ekhokhela. Ngicabanga ukuthi ukhaliphile, ukhuluma kuhle. Uselungele ukubusa. Uselamakhono amanengi ngalumsebenzi.”
Esigabeni seOregon, uMnu. David Strong uthi uzavotela uNkosikazi Harris.
”Uyazi ukuthi akulasiqiniseko sokuthi uKamala uzakhethwa ukuthi ancintise. Nxa engakhethwanga kuzakuba lengxabano kubandla lamaDemocrats.”
UNkosazana Staci Pritt weNew York uthi kuzakuba nzima ukuthi ilunga lamaDemocrats linqobe uMnu. Trump.
“Sifuna umuntu ongaluphalanga njalo ozakwenelisa. Ingqe ngubani, uzamnqoba uTrump. Asazi. Kungcono kodwa. Ngibona engani sesilethuba.”
UNkosikazi Madeline Mills we New York uthi isinqumo sikamongameli Biden siphuzile.
“Ngifisa ukuthi ngabe ibandla lama Democrats lakubona kudala lokhu ukwenzela ukuthi kungakhanyi sokugijinywa sekuyingxabangxoza. Kodwa ngibona engani uBiden ubezanqotshwa nguTrump ngabe uhlalile.”
Lanxa umongameli Biden esithi usekela uNkosikazi Harris ukuthi athathe isikhundla sakhe kulolukhetho, isinqumo sizathathwa yiziphathamandla, zama delegates, emhlanganweni we Convention yama Democrats ngenyanga ezayo edolobheni leChicago.
Forum