Owadlalela amaqembu abalisa eleHwange kanye leleHighlanders uNqobani Sangweni ukhuthaza abaphatheke kumdlalo wenguqu ukuba bengakhohlwa abasakhulayo abasemaphandleni.
USangweni uthi kumzwisa ubuhlungu kakhulu ukuba iyasilela imizamo eyokudinga abadlali abalethalenta elokudlala umdlalo wenguqu endaweni ezisemaphandleni.
“Into engingayitsho yikuba kulethalenta elimangalisayo emaphandleni lapho thina abanye esavela khona kuboMatopo laboFilabusi lakwezinye indawo. Abadinga abadlali bahamba emadolobheni kuphela njalo abantu abalidlalayo ibhola bayakwazi khonokho. Ngicela lihambe emakhaya liyebona ithalenta ngoba kanti umntwana oseKafusi, eNkayi, eBinga ubonwa ngubani? Ngilusizi kakhulu njalo ngihlezi ngikhala ngabantwana bona labo,” kutsho uSangweni.
USangweni uzalelwe esigodlweni iHarare ngomnyaka ka1983 mhla ziyisithupha insuku kunyanga kaNhlangula.
Uqale ukudlala ibhola elokitshini leMufakose okuyilapho afunda khona eMufakose 2 High.
“Ngakhulela eMufakose ku16 Hanga Close. Ngikhule ngidlala laboKhama Billiat labo Danger Fourpence njalo yikho lapho engadibana labantu ababalisa umqeqetshi uClifton Kadurira, aboMemory Mucherahowa laboMoses Chunga. Esikolo sethu eMufakose 2 High bekudlalwa kakhulu inguqu njalo ngicine sengidlalela iqembu leEiffel Wildcats kuDivision One. Ngasengisuka ngokuhamba kokuhlala ngazohlala ngapha eMatopo eplazini likababa,” kuchasisa uSangweni.
Kuthe ngemva kokuba esebuye eMatopo uSangweni udlalele amaqembu abalisa eleHwange, Shabanie Mine, Underhill, Forbes and Thomson kanye leleHighlanders lona adlale kulo ngo2009.
Ubonwe liqembu leDynamos elaseSouth Africa ngesikhathi edlalela iqembu leHighlanders kodwa kwehlule ukuba ayedlala kulo ngoba esehlutshwa lidolo.
Uthi ulenhlanganiso ehlose ukufundisa lokulimukisa uzulu wasemaphandleni ayisebenzisa ukudinga abadlali abalethalenta.
“Kulento engiyenzayo okuthiwa yiSangweni Foundation Trust. Siyabe sihamba emakhaya sifundisa lokulimukisa abantu ngokutshiyeneyo okufana lomkhuhlane wengculaza. Ngiyanxusa abadlali bakudala njengomzekeliso ngithathe uRonald Sibanda ngithi ngicela ungikhangelele umdlali odlala kuhle esiswini senkundla. Engamkhetha lowo mdlali sengimthatha abengaphansi kweSangweni Foundation Trust sesimhambisa kumaqembu afuna abadlali,” kutsho uSangweni.
Phezu kwalokho uSangweni ngumsekeli kamqeqetshi weqembu leJordan Sinnott elidlala kusigaba seSouthern Region Division One Soccer League.
Uthi isifiso sakhe yikuba ayenze izifundo zokuqeqetsha aze athole isithupha sikaCAF A.
Forum