Udaba lwezibhamu lwehlukanisa imibono yabavoti beleMelika, kulengxenye ezimbili ezisekela uhlangothi olutshiyeneyo ekuphikisaneni ngodaba lokusetshenziswa kwemibhobho nguzulu, kutsho inhlanganiso eqhuba ucwaningo eye Pew Research.
Abancintisa kukhetho, umongameli Joe Biden loMnu. Donald Trump labo balembono ehlukeneyo ngaloludaba.
Kuloyedwa phakathi kwabathathu abeleMelika balombhobho, kutsho inhlanganiso ye Pew Research Center.
Leli lilungelo elikusisekelo sombuso welizwe kodwa lwandise ukuba lomthethela kwezombusazwe ... nxa kulokudutshulwa kwabantwana besikolo njengalokho okwenzakala esikolo se Florida High School ngomnyaka ka 2018, okwabangela ukuthi amapholisa asuse abantwana ababecatshile endlini zokufunda.
Esangumongameli welizwe, uMnu. Donald Trump wahlangana lezimuli zabathintwa yingozi yokudutshwala ekhuluma ngodaba lwezibhamu.
"Sokukade kusenzakala. Kanengi nengi. Sizakulungisa lokho."
Njengomongameli, imizamo yokulungisa loludaba uMnu. Trump yayengeyokuqinisa ukuvikela izikolo ebalisa ukupha amatitshala imibhobho.
Njengoncintisayo kukhetho u-Trump utshele inhlanganiso egqugquzela ukusethsenziswa kwezibhamu ngoMgqibelo ukuthi imibhobho iqakathekile ekuzivikeleni.
“Ilizwe lethu liyanganxele. Izigilamkhuba lezikliwi zithwalisenzima abantu ezitaladeni. Ubugwala buka Biden sobubangela ukuthi sihahabele kumpi yomhlaba yesithathu.”
Esamukela uxhaso lwenhlanganiso ye National Rifle Association, u-Trump uthi u-Biden uzama ukuhluthunela imibhobho ezandleni zabalandela umthetho anqbe ilungelo lokuthwala imibhobho olukusahluko sesibili sesisekelo sombuso, iSecond Amendment.
“Kumele sibe lesahluko sesibili sesisekelo sombuso esilohlonzi. Singekela sizabona ukufa lobudlwangudlwangu okungakaze kubonakale.”
Ngemva kwesehlakalo sokubulawa kwabantwana abalitshumi lasithoba munwe munye lababalisi ababili esikolo se Texas ngomnyaka ka 2022, uMongameli Biden wathi “Kumele sithathe amanyathelo.”
"Njengesizwe, kumele sibuze ukuthi kanti sizasukuma nini simisane labagqugquzela ukusetshenziswa kwemibhobho? Sizakwenza nini sonke esazi kumele kwenziwe?”
Isigodlo se White House ledale le Congress lavumelana ngecebo lamabandla omabili ukuthi kuqheliswe uhlelo lokucubungula imbali yabasakhulayo abathenga izibhamu abalakho kuba yingozi kubo labanye
Umongameli Biden ukhankasa esebenzisa limithetho elukhuni, ikakhulu ezigabanei ezihlaselwe ludubo lwengozi yokudubulana.
"Ngasayina umthetho obalulekileyo wokusetshenziswa kwezibamu okungelangozi kuminyaka engamatshumi amathathu edluleyo, iqakathekile emphakathini engakhala lawo. Njalo ngiyakhumbula e-Atlanta, Half Moon Bay lase Monterery Park.”
Akulamithetho emitsha yokwenqabela ukusetshenziswa kwezibhamu selokho ibandla lama Republicans lathola amalunga amanengi ukwedlula ama Republicans kudale le The House ngomnyaka ka 2022.
Okhokhela amalunga ama Democrats kulelidale, uMnu. Hakeem Jefferies usola abalandeli baka Trump.
"Lamuhla, abedlulisa amalawulo abenhlanganiso ye MAGA lamalunga eCongress bengabebandla lama Republicans basuka ezikhundleni bengazange balungisese udaba lokusetshenziswa kwemibhobho kweleMelika.”
Imbono yabavoti beleMelika yehlukene ngamabandla ezombusazwe. Ucwaningo lwe Pew Research lutshengisa ukuba abebandla lama Republicans labazimeleyo kodwa besekela lelibandla balamathuba aphindwe kabili okuthenga imibhobho kulabebandla lama Democrats lalabo abalakho ukuselela lelibandla.
Forum