Ele-Zimbabwe ngelinye lamazwe omhlaba eliveze ukuba lisekela ele Russia kumpi yalo lele Ukraine osekuvuselele ubudlelwano bamazwe la womabili ele Zimbabwe lamukela njalo indlela lemikhuba yakwele Russia.
Kuzwekazi le Africa ele Zimbabwe lamazwe abalisa i-Burkina Faso le Mali yiwo avota esekela ele Russia kumanyano wamazwe womhlaba, owe United Nations.
Ngalokho, ele Russia seliphathise ele Zimbabwe ngendlela ezitshiyeneyo ezigoqela ukunikeze ilizwe amabele lendizamtshina zohlobo lwama helicopter lolunye uncedo olutshiyeneyo.
Kunje kulabantu abafika amakhulu ayisithupha-600 asebezaqala ukufunda ulimi lwesi Russia ekolitshini le University of Zimbabwe. Kulabanye njalo abafunda lolu limi ebulenjini kungemgalmbadalo.
Abanye bayakusola lokhu besithi kufana lesikhathi sombuso wabahuquluzi benotho ababefundisa uzulu isingisi ukuze bagqilazwe lula. Kodwa abebandla elibusayo lezinye ingcwethi bathi ele Russia lifuna ukuba ele Zimbabwe lisebenzise ulimi lwalo ukuze amazwe la enelisi ukwenza amabhizimusi lula.
Okhokhela ikolitshi le University of Zimbabwe, uSikhwacamfundo Paul Mapfumo utshele iStudio 7 ukuba ubudlelwano phakathi kwele Zimbabwe lele Russia busezingeni eliphezulu esithi abantwana sebefunda ulimi lwe Russia
"I-University ye Zimbabwe seyalobelana isivumelwano lelizwe le Russia njengendlela yokuba kube lodlelwano. Amakolitshi awe Russia azasincedisa ukuba sizwisise lokusebenzelana. Ukufundwa kolimi lwe Russia kuzaphathisa ukuvuselela ubudlelwano lobu,’’ kutsho uMapfumo.
Amazwi la aqiniswe ngu mmeli we Russia kuleli uMnu Nikolai Krasilnikov othi ele Russia lizaqakathekia ubudlelwano lele Zimbbawe ngesikhathi impi yalo lele Russia ivutha amalangabi.
“Siyaqakathekisa ubudlelwano lele Zimbabwe ngoba siyakwazi ukuba lingelinye lamazwe asisekelayo. Lokhu sizakwenza ngokubona ukuba ulimi lwe Russia luyafundwa kuleli,'' kutsho Krasilnikov.
Ingcwethi kundaba zokudlelana kwamazwe esebenza lenhlanganiso ye Zimbabwe Democracy Institute, uMnu Bekezela Gumbo uthi ele Russia lingakhela ele Zimbabwe njengomngane njalo ubungane lobu buyabonakala kundaba zamasiko njalo kuzancedisa ekuthengiselaneni kwamazwe lawa.
“Ubudlelwano phakathi kwamazwe ele Russia lele Zimbabwe nxa befundisa abantwana kutshengisa ukuba selokhe kwaqala impi sekule cultural diplomacy. Lokhu kuzanceda lapho amazwe lawa esefunda ukuthengiselana,” kutsho u-Gumbo.
Enye ingcwethi esebenza kundaba zokuzwelana kwamazwe ephansi kwenhlanganiso ye Leaders for Africa Network ngu Mnu Teddy Ncube. Ke sizwe imbono yakhe:
“Kutshengisa ukuba amazwe lawa asesenelisa ukukhweza izinga lawo lokuthengiselana ngoba lapho kufundwa ulimi kusuka kuhambelane lasekuthengiselaneni njengalokho esikubona ngolimi lwesikhiwa,” kutsho u-Ncube.
Uhulumende we Zimbabwe uthi uqakathekisa ubudlelwano lamazwe afana le Russia kungelani lempi, lokhu kutshiyo yisiphathamandla sika hulumende kundaba zokukhitshwa kwemibiko uMnu Richard Mahomva.
“Uhulumende we Zimbabwe vele ulobudlelwano lele Russia. Lokhu esikubonayo kwaqala kudala impi isiqinise ubungane bethu obabuvele bukhona kusukela empini. IRussia ngumngane wethu omkhulu,” kutsho uMahomva.
Omunye ofunda ekolitshini le University of Zimbabwe uSikholiwe Ndlovu uthi ukufunda ngolimi lwe Russia kwamncedisa ukuze enelise ukwenza ibhizimusi.
“Ukufunda ulimi lolu kuqakathekile njalo ngibona sengathi kuveza ubudlelwano obukhona phakathi kwelizwe lethu lele Russia. Siyakuqakathekisa kakhulukazi, kusenza senelise ukukhweza amathuba amabhizimusi,” kutsho uNdlovu.
Impi yakwele Russia lele Ukraine yaqala ngomnyaka ka 2014 yathula okweminya embalwa yasivuka njalo ngomnyaka 2022. Amazwe amanengi abalisa eleMelika lawomanyano we Nato basekela ele Ukraine.
Malutshwana kakhulu amazwe asekela ele Russia.
Ngesikhathi sempi yenkululekho ele Russia laphathisa kakhulu amabutho evuyo le Zipra ukulwisaneni lamabutho abahuquluzi benotho.
Forum