Abohlangothi lukahulumende olubona ngezekulondolozwa kwezemvelo olwe Zimbabwe Parks and Wildlife Management Authority -Zimparks ngolweSihlanu bethule inguquko kumthetho wokulondolozwa kwemvelo ngenhloso yokuqondisa ukuphathwa kwemonakalo ebangwelwa zinyamazana zendle ebantwini.
Limonakalo igoqela ukubulawa kumbe ukulinyazwa kwabantu ngenxa yokufuthelana okusuka kube khona phakathi kwabantu lezinyamazana zendle lezi kubangwa amanzi lamadlelo.
Umthetho lo we Parks & Wildlife Management Bill, uzapasiswa ngemva kokuphanyekwa kuzulu, qede uyehlaziywa edale lephalamende, anduba uMongameli Emmerson Mnangagwa awusayine bese uyaqala ukusebenza.
Abe Zimparks bathi bakubona kufanele ukuba uguqulwe lumthetho ngoba wabunjwa ngabamhlophe phambilini kukazibuze, lapho owawungakhangeli ukuvikelwa komuntu nxa kuqathaniswa lezinyamazana zendle kanye lamalunglo akhe, ngokuthi kwengezelelwe isitsha sesikhwama sokuphathisa abathintekileyo eseWildlife Conflict Relief Fund.
Lokhu kusekelwa nguMnumzana Farai Maguwu wenhlanganiso ye Centre for Natural Rsources Governance othi bayawemukela, kodwa kufuze ukhangele njalo ekukhokheleni izakhamizi ezibhidlizelwa izilimo labadlelwa izifuyo.
“Okusilelayo kiwo yikukhokhelwa kwabantu sebebhidlizelwa izilimo zinyamazana zendle lezi ngaphandle kwalokho, thina siyawamukela.” kutsho uMaguwu.
UNkosikazi Siphiwe Sibanda wemangweni weVulindlela, eHwange, uthi umthetho lo kufuze uqakathekise ukuphathiswa kodlelweyo.
“Thina silendawo esingani siyasilela ikakhulu emasimini siyalima zona zilandelele zidle, inkomo zifuye impisi lezilwane lazo zilandelele ziqede kodwa asibhadalwa, ngakho kufuze abhadale kumacele onke.”
Umnumzana Philani Ngwenya wesiqintini senduna uMvuthu uthi isikhwama seHuman Wildlife Conflict Relief Fund bekufuze siqalele phansi ekukhokheleni asebafelwayo, balinyazwa njalo labadlelwayo.
“Mina ngake ngadlelwa inkomo ezifika five, njalo ngicabanga ukuba ngabe sezandile kodwa nxa sekubalelwa laba abaphezulu okuthiwa bazakhangelelwa thina esisemuva sikhangelelwa njani.”uNgwenya ngelokudideka.
Ukhansila we Hwange Rural District Council uMnumzana Given Mkhontokatshaka Moyo uthi umthetho lo utshayindiva ngokuyikho okumqoka kudaba lokufuthelana phakathi kwabantu lezendle.
“Thina esidlelweyo savala izibaya uthini ngathi?”kubuza njalo uMoyo.
“Labo abavale amasimu uthini ngabo, abatshiye imizi ngenyamazana uthini ngabo lobuyanga obungenebantwini uthini ngabo?”
Isikhulumeli sohlangothi lweZimparks, uMnumzana Tinashe Farawo ucele ukuphiwa isikhatshana sokuhluzisisa limbona kanye lomthetho lo aduba aphendule lumsakazo, kodwa uthi ukufuthelana lokhu akuyinganeno.
“Sefelwa ngabantu angu 50 kumnyakophelileyo okwabanganeno nxa siqathanisa lalowana okwafa abangu 68, kodwa lonyaka siqhubeka sithola incingo zemonakalo ngezinga eliphezulu kakhulu.”kutsho uFarawo.
Inengi lithi kufuze kuqalwe ukuqhutshwa uphenyo lokuxoxisana labathinteka yikufuthelana phakathi kwezinyamazana zendle labantu, kukhulunywe lokuthi imali yokubahlawula izavela kubani njalo iyisilinganiso esingakanani, qede ubusupasiswa.
Ingcwethi zokulondolozwa kwemvelo zithi ukufuthelana phakathi kwabantu lezinyamazna zendle kubangelwa yikusweleka kwamanzi ezihonqweni kanye lamadlelo okwenza inyamazana lezi zifohlele ebantwini.
Zithi njalo lolu udubo lwengezwe yikungabiyelwa kwezihonqo ngesikhathi inani lenyamazana lezi lalo lisiya liqonga.
Umthetho lo uzabuya njalo ukhangele lokhu, kanye lokuthi izakhamizi zingaphiwa lungelo bani kwezokuzingela okulenzuzo ama hunting concessions lama hunting quota.
Forum