Ihlandla lesibili lohlelo lokuthontisela abantwana abaleminyaka engaphansi kwelitshumi yokuzalwa umuthi wokuzivikela emkhuhlaneni owepolio, luqalisile lamuhla elizweni lonke jikelele.
Uhlelo lolu luqhutshwa luhlangothi lwezempilakahle, inhlanganiso yeUNICEF leyeWorld Health Organization njalo luqondiswa ngabe Global Eradication Initiative.
EleZimbabwe linikwe umuthi olesisindo esedlula kancane izigidi ezilitshumi lengxenye – 10,6 million vaccines. Lolu hlelo lukhangelelwe ukufinyelela abantwana abafika izigidi ezine – 4 million kusukela namuhla kuze kuyefika uNcwabakazi womnyaka ozayo.
Umongikazi ophethe uhlangothi lwezempilakahle kukhansili yakoBulawayo uNkosikazi Sithokozile Hove uthi kuqakathekile ukulwisana lomkhakha we-polio okuthiwa yi-poliovirus type 2.
"Sikhangelele ukufinyelela wonke umntwana omele athontiselwe umuthi ovikela iPolio njalo abantwana abathontiselwe kunyanga edlule siyabathontisela okwesibili kuthi asebedlule iminyaka elitshumi beke bathontiselwa okwakuqala labo siyabaphinda."
Uhlelo lweNovel Oral Poliomyelitis Vaccine 2 luqhutshwa emakilinika lezibhedlela. UNkosikazi Hove uqhubeka echasisa ngokuqhutshwa kwehlandla lakuqala eliqhutshwe ngenyanga edluleyo ekaNhlolanja.
"Uhlelo lwethu luqhubeka khle njalo siyajabula ukuthi silazise ukuba abantwana abathontiselwayo koBulawayo babalikhulu eliletshumi lanye ekhulwini-111 percent njalo sikhangelele ukwedlula lesisilinganiso ukuze wonke umntwana athole ukuvikelwa ukuhlaselwa yiPolio ngoba ayelapheki ngakho kuqakathekile ukuthi umntwana avikelwe esasemncane. Basakhona abangakathontiselwa ngezizatho ezehlukeneyo kodwa sikhangelele ukufinyelela wonke umntwana koBulawayo."
Omunye obe ngowakuqala ukuhambisa umntwana ekilinika namhlanje, nguNkosikazi Nomusa Ncube ohlala eSizinda koBulawayo. Yenake uchasisa ngokuqakatheka kokuthontiselwa kwabantwana umuthi wokuvikela iPolio.
“Lolu luhlelo oluqakatheke okwamagama abazukulu bami sebethontiselwe asilindanga ukuba basilande emakhaya. Ngikhuthaza omama abalabantwana ukuba baze ekilinika bezothontisela abantwana ikakhulu laba abasakhulayo ngoba kuvikela ukuba abantwana babeyizigoga."
Isakhamuzi sakoBulawayo uNkosikazi Princess Bhebhe uchaze ukuba umntanakhe uza okwesibili ukuzothontiselwa.
"NgoFebruary umntanami wathontiselwa okwakuqala njalo lamuhla bengilande amaphilisi ami ngahle ngathatha ithuba lokuthi athontiselwe okwesibili ulenyanga ezinhlanu."
Isakhamuzi seTshabalala uNkosikazi Vimbiso Majiji laye uthi uzothontisela okwesibili.
"Umntanami uleone year six months ngoFebruary wathontisela lamuhla besilande ukuzothontisela okwesibili njalo loluhlelo luqakathekile ngoba luyavikela umntwana ukuhlaselwa yiPolio njalo wayevele evikele kuqala kodwa loluhlelo olutsha singenile njalo."
Leli hlandla lesibili eliqale lamuhla kusiyafika NgoLwesihlanu kuyonale iviki likhangelelwe ukufinyhelela abantwana abedlula inkulungwane ezingamakhulu amabili-214,586.
Phansi kwalolu hlelo eleZimbabwe linika abantwana umuthi obizwa ngokuthi yi-OPV2 vaccine osetshenziswa kwele Ethiopia, Benin, Congo Republic, Liberia, Nigeria lakwele Sierra Leone kusukela ngomnyaka ka2021.
Ngomnyaka odluleyo ngoMfumfu uhulumende ubike ngokufunyanwa kwePolio eSanyati emntwaneni oleminyaka engaphansi kwelitshumi. EleZimbabwe lacina ukuba labantwana abatholakala belePolio ngomnyaka ka1989, kuthi ngomnyaka ka 2005 iZimbabwe yathola imendulo yokuba lilizwe esenelise ukuwuqeda umkhuhlane wePolio kulandela uhlelo lwayo oluqinileyo lokuthontisela abantwana umuthi wamavaccine.
Forum