Abantu abahlaselwe yindlala koZimnyama, ePlumtree, bajabule okwamagama ngemva kokwabelwa usizo lokudla ngabenhlanganiso ephathisa abalambayo emhlabeni jikelele eyeWorld Food Program imanyene leyeWorld Vision kanye logatsha lukahulumende waseMelika olweUSAID, Ngolwesihlanu.
Izakhamizi zakoZimnyama ezilambayo zibuthene eMqegula Business Center namuhla zisamukela ukudla lokhu phansi kohlelo lweLean Food Program.
Umuntu ngamunye ubeholiswa i-8.5kg yesaka lamabele, okuyisigujana kwamafutha okupheka i-cooking oil kanye lendumba ezilesisindo sama-kgs edlula kancane amathathu, 3.4kgs.
Omunye wabathole ukudla lokhu nguNkosikazi Cecilia Nyoni, yena othi indlala ibhahile kulesisigaba njalo ihlasele hatshi abantu kuphela kodwa lezifuyo ngoba akuselamadlelo kanye lamanzi okunatha.
"Umangoye selala eziko lokhe umbyaka uqalile besikulimile sekutshile kuthi lenkomo lazo zibhekane lendla enkulu sicela uhulumende aphange asisize singabulawa yindlala eMangwe."
USobhuku weMacingwane kuWard 12 uMnu Ellias Ncube, laye uthi ngaphandle kwendlala, uzulu walindawo uthwele amagabha avuzayo ngodubo lwamanzi.
"Umango wakithi wonke ubhekane lendlala kuthi izilimo zethu lazo zitshile qhu akuthembisi sibhekane lendlala enkulu."
Ekhuluma kumbuthano lo umqondisi weWFP, uNkosikazi Christine Mendes, uthe okwamanje baphathisa abalambayo ezigodini ezine kuphela zelizwe ezibalisa iBubi, Mangwe, Chivi leBuhera phakathi kwezingamatshumi ayisithupha njalo uthe banceda abantu abedlula inkulungwane ezingamakhulu amabili, 264 000.
UMenendes uthi lokhu bakwenza belandela uphenyo lukahulumende olwenziwe ngo2023 olwaluphuma lenani labantu abazadinga usizo lokudla isikhathi sokuvuna lonyaka singakafiki.
"Sisebenzelana leUSAID, World Vision, uhulumende weZimbabee lenhlanganiso ezinye ezithile besitholisa izigaba ezine ukudla njalo uhlelo lolu luyaphela kuyonale inyanga ngoba besiqhuba loluhlelo silandela iziqondiso zikahulumende zokutholisa uiudla abantu bengakavuni."
Umgcinisihlalo weMangwe Rural District Council uMnu Walter Mpofu, ongukhansila kaWard 9 uthe lanxa belubonga usizo abaluthole namuhla, bacela ukuba uhulumende kanye lenhlanganiso lezi ziqhelise uncedo lokudla ngoba indlala idlangile eMangwe laseMatabeleland South yonke jikelele.
"Sikhangelele uiuba uhulumende atholise wonke umuntu ukudla engabilenkethabetshabi ngoba iMangwe yonke ibhekane lendlala esabekayo. Loba besilimile inhlanyelo ezincane zivele zatshiswa lilanga elibaseleyo."
Umphathihtambo wezokulima uMnu Vangelis Haritatos, uthi khona besazoqhuba uhlelo lokudingisisa umonakalo wendlala ukuze babone ukuthi kahle-kahle bangaki abantu abadinga ukuphathiswa ngokudla.
Asikaphumi lenani eliqondileyo labantu ababhekane lendlala sisazo qhuba uhlelo olunonge lokho ukuze uhulumende azi ukuthi bangaki abantu ababhekane lendlala.
Umphathintambo obona ngenhlelo zokuncedisa abaswelayo uMnu July Moyo ubexhase abeWorld Food Program labanye babo, ehlola uhleli lokupha abantu ukudla kusetshenziswa amakhadi ebulenjini. Uzulu weBubi laye wabelwe ukudla phansi kohlelo lunye.
EleZimbabwe libhekane lendlala esabekayo ngenxa yokungani kuhle kwezulu nyakenye lalonyaka okubaselwe yisikhudumezi somkhathi esibizwa ngokuthi yi-El Nino.
Isigaba seMatabeleland North yiso esihlaselwe yindlala ukwedlula indawo zonke zelizwe njalo sihamba phambili ngenani labadinga ukuphathiswa ngokudla.
Lanxa uhulumende esithi abantu abalambayo eZimbabwe yonke bayizigidi phose ezintathu, 2.7 million, inhlanganiso yeFood and Agriculture Organization ithi inani leli selikhuphuke laya kuzigidi phose ezine, 3.5 million.
Forum