Umongameli Emmerson Mnangagwa uqhubekela phambili ngamanyathelo okubeka umthetho we Private Voluntary Organisations lanxa inhlanganiso yomanyano wamazwe womhlaba eye-United Nations lezinye ezilwela amalungelo oluntu zisithi umthetho lo uzaphazamisa ukusebenza kwenhlanganiso ezilwela amalungelo oluntu njalo usephula ilungelo lokuzikhethela inhlanganiso zokusebenza lazo.
Idale leSenethi lavotela lumthetho ngoNhlolanja nyakenye, njalo u-Mnangagwa wabisela lumthetho ephalamende esithi kumele uguqulwe kodwa abalwela amalungelo oluntu bathi okuguqulwayo lokhu akuphathisi.
Inhlanganiso ebona ngokulondolozwa kwelungelo loluntu emhlabeni jikelele, eye-Amnesty International ithi umthetho lo ungabekwa uzakwenza ukuthi inhlanganiso zonke ezisebenza zizimele, zingenelisi ukusebenza eZimbabwe nxa zingabhalisanga njengama-PVO.
Umphathintambo wogatsha lwezemithetho uMnu Ziyambi Ziyambi watshela umsakazo weStudio7 ukuthi umthetho lo uzama ukumisa imisebenzi yabalwa becatsha abedlulisa amalawulo kanye lokumisa ukungenela kwezombusazwe kwenhlanganiso ezisebenza zizimele.
Exoxa leStudio7 olwela amalungelo oluntu ekhokhela inhlanganiso elwela amalungelo oluntu eye-Ibhetshu Likazulu uMnu Mbuso Fuzwayo uthi uhulumende uzama ukwethusela abalwela amalungelo oluntu ukuze bengakhulumi ngokwephulwa kwamalungelo kazulu eZimbabwe.
Forum