Umsakazo weStudio 7 wethekelele inhlanganiso ye Victoria Falls Anti-Poaching Unit leye Victoria Falls Wildlife Trust ngenhloso yokuzwisisa inhlelo zemvelo abazenzayo esigcawini lesi, lapho abaveze ukuba okwalezinsuku bamatasa ngokulwisana lencingo kanye lezilaha ezihamba zigxunyekwa lapha laphaya, ikakhulu esihonqweni se Zambezi National Park.
Umholi we Victoria Falls Wildlife Trust, uMnumzana Roger Parry owasungula linhlanganiso ngomnyaka ka 2008, uthi badobha imjibila efika ikhulu ngenyanga, njalo ngeviki balapha inyamazana ezehlukeneyo ezisuka zikhanywe, kodwa ezinengi zificakala zibanjwe zafa.
“Thina ngomnyaka silapha ezedlula ezingamatshumi amahlanu lokhu kusitsho ukuthi iviki ngeviki esibhedlela sethu silapha elinyazwe yimjibila la le.Ngesikhathi se Covid-19 sasilapha ezifika amatshumi ayisitshiyagolombili, ezinengi zakhona kuzindlovu lenyathi.”
Ngokomzekeliso, uParry uthi indlovu eyodwa idinga imithi yokwelatshwa engafika amakhulu amahlanu amadola eMelika.
Owenhlanganiso ye Victoria Falls Anti-Poaching Unit, uMnumzana Nathan Webb, uthi kunsukwana ezedluleyo badibane lenyamazana ezehlukeneyo zifelemjibileni, engeza njalo ukuthi indlovu ezimbalwa lazo sezalimala imboko lamasondo sibi senyathi.
uWebb uthi amajambo ebutho labo elibalela amadoda alitshumi lanhlanu athungatha ebususku lemini phakathi kwamahlathi.
“Kuthatha is’bindi ukukwenza lokhu ngoba uyadibana labazingeli laba behlome ngembhobho, imkhonto kanye lezinye izikhali kodwa kweneliswa ngumuntu olesibindi njalo olesihelo ngezemvelo okuyikho amabutho ethu loba elihlekana akwenzayo.”
Ngobunzima bomsebenzi lo, ngomnyaka ka 2022, inhlanganiso le yafelwa ngelinye lebutho elahlaselwa yindlovu ekuthungatheni lokhu, kodwa lokhu akuzange kubamise enjongweni yabo yokuliwisana labazingela ngokungekho emthethweni.
“S’thwelenzima ngabantu abazingela ngokuganga. Bahlukene, abanye bakwenzele ukugcina imuli kodwa inengi ngeligxumeka imjibila emnengi kakhulu egangeni bekhangelele ukubamba inyamazana ezinengi ngasikhathi sinye ngenhloso yokuthengisa ebhutsha.”
UParry uthi ngombono wakhe, uhlupho lokuzingelwa kwenyamazana zendle lezi lubangelwa yisimo esinzima somnotho welizwe esithi ngomnyaka ka 2006 kusiya ku eight banengi njalo abahlahla amehlo enyamazaneni, kwenzeka njalo ngemnyaka ye Covid-19.
“Ngomzila lo, kuyacaca ukuthi ukuwa komnotho kuyaphazamisa njalo ezendle, ngoba nxa konke kukuhle lenyamazana ziyavikeleka. Lingizwe kuhle, angikhulumeli labo abazingela ngobuhwaba befuna ukwenza imali.”
Engxoxweni lomunye kwenkokheli yeHlanganani, uMnumzana Musa Ndlovu, uthi ubudlelwano nje phakathi komuntu lenyamazana bumunyu ngoba lazo zibulawa nje, lazo ziyabulala, zibhidliza njalo izifuyo lezilimo.
“Nxa ngibona inyamazana sengibona isitha, ikanti ke loba zingasidlela nxa ngilenzuzo ngiyabe ngisithi yinyamazana yami.”
Izakhamizi lezi zithi ukuze kubenganeno, bafuna ukuphiwa amandla nguhulumende kunzuzo yalezinyamazana –iquater system ukuze labo abadlelweyo bakhokhelwe, kubuye njalo kufakwe imingcele ehlukanisa abantu lezihonqo, kodwa lokhu uhulumende kakakuthathelinyathelo.
Njengenhlanganiso uParry uthi sebelenhlelo abazenzayo ukuzama ukuphathisa izakhamizi ukuthi zithole inzuzo ezifuyweni zabo ehlelweni lwe Hearding for Health lapho abaqhatsha abelusi ngendlela zokuvikela ukuthi bengadlelwa amadlelweni yizilwane zithole njalo ukulatshwa lokudijiswa ukuze nxa sezithengiswa zibe lentengo ephezulu.
Forum