Ozithi ungunobhala jikelele weCCC uMnu Sengezo Tshabangu uselilunga ledale lePhalamende eleSenate ndawonye labanye abayisitshiyangalombili ngemva kokuxotshisa kwakhe amalunga ayesekela uMnu Nelson Chamisa, yena osowatshiya isikhundla sokukhokhele lelibandla njalo waphuma kulo esithi selingenwe zimpehlane zeZanu PF.
Ukungena kukaTshabangu edale leSenate sokucunule abanye kucele lakhe eleCCC.
Uhulumende wazise kugwalo lwakhe lweGovernment Gazzette Ngolwesihlanu ukuthi abanye asebengamalunga edale leSenate loTshabangu babalisa uLilian Mlilo, uKucaca Phulu, uLinda Sibanda, loCollet Ndhlovu, bona abazamela idolobho lakoBulawayo.
Abanye njalo babalisa uMaxwell Mdluri ozamela iManicaland, uSam Chapfudza ozamela iMasvingo kanye labazamela isigaba seMatabeleland North abathi yena uTshabangu, uTeresa Kabondo, kanye loGrace Mumpande.
Abantu laba bangena ezikhundlani ezatshiywa ngamalunga aweCCC axotshiswa edale lePhalamende nguTshabangu ngoba esekela owayengumkhokheli weCCC osowaphuma kulelibandla uMnu Nelson Chamisa.
Kodwa abanye abakuqembu likaTshabangu bayakhonona ngokungena kwakhe kuSenate besithi usezikhethile yena ebatshiya phandle.
Omunye wabakhononayo nguMnu Albert Mhlanga, yena othi wayekhethiwe ukuba angene kuSenate, kodwa uthi usemangala ukuthi uvalelwe phandle njani.
"Incwadi yabuya eyasenza saphuma lamagama eliwabone kuGazette njalo loTshabangu sazivumile ukuthi abenguSenator kodwa sisithi kuzyangisa ukuthi angene laye evuma uPhulu wayengekho kumabizo esaphuma lawo lami babevumile ukuthi ngizakuba nguSenator kodwa sebengukhuphile."
Kodwa isikhulumeli secele leCCC elisekela uTshabangu uMnu Alfred Dzirutwe uthi okuphume kuGovernment Gazette kuliqiniso njalo yisinqumo esithethwe libandla lakhe.
"Amabizo aphume kuGazette avele ebandleni njalo loSengezo Tshabangu ukhona ngoba ekhethwe libandla."
Uqhubeke phambili ethi akaboni lutho olubi ngokungena kukaTshabangu kuSenate ngoba yibo abamthumileyo njengebandla leCCC.
"UTshabangu simthumile njebandla ukuba ayesimel edale leSenate ukuze imijijo yethu layo yamukeleke sakhe isizwe njalo uzabe ekhokhela idale leSenate emele amabandla aphikisayo."
Izakhamizi zakoBulawayo lazo zilembono etshiyeneyo. Lanxa abanye besola uTshhabangu, omunye umhlali wako Bulawayo, uMnu Maluba Mhlaba uthi akasoli lutho.
"Siwabonile amabizo okukhona yikuthi uTshabangu ubexotsha abanye yena usekhethwe ngubani kumbe uzikhethile."
Olwela amalungelo oluntu uNkosikazi Patricia Tshabalala uthi kuqondile ukungena kwabomama labesilisa ngokulinganayo edale besiyamela uzulu.
"Ngithakazelela ukungena kwaboMama njalo sikhangelele uiuba bayemela abantu bahloniphe abantu."
Asebengene kudale leSanate laba bathatha izikhundla zalabo abaxotshiswa nguTshabangu ababalisa uHellen Ziriva, Gideon Shoko, Siphiwe Ncube, Felix Magagelela Mafa Sibanda, David Antony Chimhini, Godfrey Mativenga Madzikanda, Anastasia Moyo, Joel Gabbuza loTenda Sibanda.
Abakhethwe ukungena edale lePhalamende eleNational Assembly bemele omama ngaphansi kweProportional Representation babalisa abakoBulawayo uNomvula Mguni, Otilia Sibanda, Lungile Ncube loSikhuphukile Dube. EMatabeleland South kulo Sibongile Maphosa. Ababexitshiwe kuCCC nguStabile Mlilo, Jassmine Toffa, Janeth Dube Evidence Zana Sivina loVelisiwe Nkomo.
Asenelisanga ukuxhumana loTshabangu ngaloludaba ngoba ubengadobhi ucingo lwakhe.
Forum