EleMelika lithi aliseyi kuqhubeka ngokuphatheka kunhlelo lengxoxo zokuphathisa eleZimbabwe ukuthi lesulelwe izikwelede zalo kulandela indlela ukhetho olwedluleyo olwaqhutshwa ngalo, elithi lwalungakhululekanga.
Lokhu kuvezwe yisiphathamandla sesigodlo seMelika eZimbabwe uNkosikazi Elaine French, kungxoxo ayiqhube leStudio 7. EleMelika beliphatheka kuhlelo lokuphathisa eleZimbabwe olwe High Level Debt Resolution Forum: Arrears and Clearance and Debt Resolution Process. UNkosikazi French uthi eleZimbabwe lathembisa kulimbuthano ukuthi lizaguqula indlela eliqhuba ngayo ukhetho lokunanza amalungelo oluntu kodwa alikakwenzi lokhu.
Ugcizelele wathi ubudlelwano beZimbabwe leleMelika buyaxega ngenxa yokuthi alilandeli amalungelo oluntu.
Ingcwethi ecubungula ezombusazwe uMnu. Masimba Kuchera uthi inyathelo elithethwe yiMelika lizabuyisela eleZimbabwe emuva
EleZimbabwe lilezikwelede ezedlula amabhiliyoni amadola eMelika alitshumi lasikhombisa kunhlanganiso kanye lamabhanga eboleka imali agoqela eye African Development Bank World Bank, le European Investment Bank.
Asenelisanga ukukhuluma lohulumende ngaloludaba, kodwa isiphathamandla sebandla elibusayo eleZANU PF Farai Marapira utshele iStudio 7 ukuthi abavumelani lombono weMelika owokuthi ukhetho lwalungakhululekanga ngoba ngempela lwaqhutshwa ngemfanelo.
Forum