EleZimbabwe linanze ikhefu leUnity Day, Ngolwesihlanu, uMongameli Emmerson Mnangagwa ekhuthaza uzulu ukuthi amanyane njalo esebenza ndawonye ukuze kube lentuthuko elizweni. Kodwa abanye bathi isivumelwano seUnity Accord esadala ukuthi kusungulwe lelikhefu asisatsho luthi ebantwini abanengi.
Usuku lweUnity Day lwasungulwa ngomnyaka ka1987 ngemva kokuba umkhokheli webandla leZapu uMnu Joshua Nkomo elobelane isivumelwano lowayeyinhloko kahulumende njalo ekhokhela ibandla leZanu PF uMnu Robert Mugabe. Lesi yiso isivumelwano esamisa ukubulawa mahlayana kwabantu bemhlubulweni oweMatabeleland laseMidlands libutho likaMugabe eleFifth Brigade.
Lokhu kwamanyanisa ibandla lePF Zapu leleZanu PF, uNkomo wangena kuhulumende kaMugabe. Embikweni awethule enkundleni yeX namuhla, uMongameli Mnangagwa uthe abantu beZimbabwe kumele baqakathekise ukubambana okwasungulwa nguMugabe loNkomo njalo besebenze ndawonye ukuze bathuthukise ilizwe labo.
Kodwa abanye bathi akulakubambana okukhona eZimbabwe njalo bathi isivumelwano seUnity Accord asiselamnkantsho ngoba uhulumende akasiqakathekisi.
Umsekeli kaMayor wedolobho lakoBulawayo uMnu Edwin Ndlovu uthi alusatsho lutho usuku lweUnity Day emhlubulweni weMaNdebeleni.
"Lamhlanje lilanga leUnity Day eZimbabwe kodwa lelilanga alisatsho lutho kithi emhlubuleni weMaNdebeleni ngoba akulantuthuko ekhona, lokhe sithwalisenzima. lbizasebenza ngabe sibanjwa njengabantu abaseZimbabwe kuthi okwavunyelwanayo kuyafezeka iyize leze iUnity Day okwamnye.
Kodwa uKhansila webandla leZanu PF koBulawayo uNkosikazi Nokuthula Sibanda uthi liqakathekile kakhulu lelilanga njalo abantu kumele baqhubeke bebambene.
"Abantu kumele babambane babemunye kungabi lokukhethana ngomhlobo ukuze kubelengqubekela phambili"
Unobhala jikelele webandla leZapu uMnu Ndodana Moyo uthi ilanga leUnity Day liyabathunuka njalo libakhumbuza umbhuqazwe weGukurahundi, wona owabulalisa abantu abedlula inkulungwane ezingamatshumi amabili, 20,000 eMatabeleland laseMidlands.
"U22 December akusilolanga lokujabula, lilanga elibuhlungu kakhulu lapho esikhumbula khona izihlobo zethu ezafa zibulawa nguhulumende weZANu PF, sabona ukugongodwa kwebutho leZAPU iZPRA lokuzingelwa kwabalandeli beZAPU lenkokheli zeZAPU. Akulalutho olungasenza sijabule ngoba iGukurahundi ayimanga lokhe ikhona kudala kwakubulawa abantu manje uhulumende okhona isisibulala ngokusincindezela ubandlululo akulantuthuko lokuphilisana kuhle."
Ilunga leCitizens Coalition for Change uMnu Swithern Chirowodza yena uthi umbuso kahulumende omubi wenza ilanga leUnity Day lilahlekelwe luhlonzi.
"Sonke siyazi ukuthi injongo yokubalombhuqazwe kakuyikuzama ukutshabalalisa uMthwakazi lapho umuyi uRobert Mugabe labanye bakhe oEmmerso Mnangagwa babekhokhela loluhlelo kodwa lwama indlela yokutshabalalisa isizwe ngokuba umuyi UJoshua Nkomo wazehlisa wavuma ukusayina iUnity Accord njalo ubuhle obukhona yikuthi isizwe esasimele sitshabalale sasinda kumbhuqazwe abantu bayaphila loba bencindezelwa."
Isiphathamandla senhlanganiso elwela amalungelo oluntu eyeIbhetshu LikaZulu uMnu Mbuso Fuzwayo laye upha umbono wakhe ngalolusuku.
"U22 December lilanga eliqakathekileyo lazalwa ligazi Labantu ababulawa nguhulumende bengelacala eNkabazwe leMatabeleland lilanga esikhumbula abantu labanye abangaziwayo ukuthi bajikelwa ngaphi siyabe sibakhala sisithi abalale ngokuthula ngoba ilanga leli alikalungisiswa ngokupheleleyo njalo sekwephulwa lesisivumelano. Besihlangene sibakhumbula siyaliqakathekisa ngoba umuyi uJoshua Nkomo wavuma ukusayina lesisivumelwano ukuze amise ukubulawa kwabantu."
UMongameli Mnangagwa uphe izinduna lenkokheli zamasiko umlandu wokukhulumisana lozulu ukuze kulungisiswe udaba lombuqazwe weGukurahundi kodwa abanye bathi imizamo yakhe izaphelela eboyeni njengezithukuthuku zenja ngoba akaluphathi kuhle loludaba.
Forum